Өмнө долоо хоногт 30 дахь удаагийн Үндэсний номын баяр “Өдөр бүр уншъя” уриатайгаар зохион байгуулагдсан. Тус баярын нээлтийн үеэр Ерөнхий боловсролын сургуулийн найман сурагч “Тэргүүний уншигч – Нацагдорж тэмдэгтэн” шагналаар шагнуулсан юм. Тэдний дундаас хэвлүүхэн яриа, гүн бодлоороо бусдаасаа онцгойрч харагдсан Б.Түвшинсайхантай ярилцлаа.

-“Тэргүүний уншигч – Нацагдорж тэмдэгтэн”-ээр шалгарсанд нь баяр хүргэе. Хоёулаа танилцъя?

       -Баярлалаа. Намайг Балжиннямын Түвшинсайхан гэдэг. Би 142 дугаар сургуулийн 6а ангид сурдаг. Одоо 11 настай. Төв талбай дээр, номын баяраар шагнал авахад маш сайхан санагдсан. Надад шагналтай хамт Хятад Улсын зохиолч Сяо Лин Дин Даны зохиол “Адлагдсан ногоонууд аминд орсон нь” гэдэг ном бэлэглэсэн. Одоо номоо уншаад л сууж байна. Номын санд буцааж өгөхгүй, минийх гэж бодохоор цээжин дотор гижиг хүрээд байгаа.

-Ийм сайхан шагнал авсан болохоор олон ном уншжээ?

      -Олон ном уншсан хүүхдэд ийм шагнал өгдөг гэдгийг сонсож байсан. Гэхдээ би шагнал авах гэж ном уншаагүй ээ. Зүгээр л дуртай болохоор зөндөө ном уншсан. Уншсан номынхоо дүр, үйл явдлыг бодохоор сайхан байдаг. Зарим номын төгсгөл нь уншиж байгаа хүүхэд цаашаа үргэлжлүүлэн бодох, бичих боломжтой байдаг болохоор маш сонирхолтой санагддаг. Үргэлжлүүлээд өөрөө зохиож бичихийг хүсдэг шүү.

-Сайхан хүсэл байна. Тэгээд ном үргэлжлүүлэн бичиж үзэв үү?

       -Одоохондоо бичиж чадахгүй байгаа. Зохиолч хүмүүс чинь дандаа том хүн байдаг. Над шиг жаахан хүүхэд бичдэггүй байх аа. Би унших л дуртай. Нэгдүгээр ангид орсноосоо хойш ном уншиж эхэлсэн. Адал явдалтай, хөгжилтэй ном унших гоё байдаг. Би уншсан номоороо тэмдэглэл хөтөлдөг. Заримдаа уншиж байсан ч гэсэн мартах тохиолдол гардаг. Тэр үед тэмдэглэлээ сөхөж хараад л саначихна. Уг нь би танд тэмдэглэлээ үзүүлмээр л байна. Даанч өвөөгийндөө орхичихсон.

Надад шагналтай хамт Хятад Улсын зохиолч Сяо Лин Дин Даны зохиол “Адлагдсан ногоонууд аминд орсон нь” гэдэг ном бэлэглэсэн. Одоо номоо уншаад л сууж байна. Номын санд буцааж өгөхгүй, минийх гэж бодохоор цээжин дотор гижиг хүрээд байгаа

-Чиний уншиж байсан хамгийн гоё ном ямар ном байсан бэ?

        -Би олон ном уншсан. Аль нэгийг нь хэлэхээр бусад нь гомдчихно шүү дээ. Гэхдээ танд хэлснийг минь мэдэхгүй болохоор Ч.Дикенсийн “Агуу их хүсэл” гэдэг номыг хамгийн гоё гэж бодож байна. Дэлхийн хүүхдийн сонгодог зохиол болохоор үйл явдал нь санаанаас гардаггүй юм.

-Чамайг ном унших дуртай болоход хэн нөлөөлсөн бэ. Танайх олон номтой юу?

        -Өвөө намайг номонд дуртай болгосон. Аав, ээж хоёр маань гадаадад байдаг болохоор би өвөө, эмээ хоёртойгоо хамт амьдардаг. Манай гэрт олон ном байхгүй ээ. Өвөө бид хоёр Хүүхдийн төв номын сан руу очиж, гэрээр ном олгох тасгаас нь хамтдаа ном авдаг юм. Ном унших гоё ч гэсэн өвөөтэйгөө номын сан руу явах л хамгийн сайхан. Яагаад гэвэл номын сан руу явах замдаа өвөө автобусны цонхоор надад газар зааж өгдөг. Өвөө өөртөө бас надад ном авна.

-Долоо хоногийн хэдэн өдөр, хэчнээн цагаар ном уншдаг вэ?

       -Долоо хоногийн дөрвөн өдөр, өдөрт хоёр цаг ном уншдаг. Өвөө намайг “Миний хүү хоёр цаг уншихдаа маш сайн ойлгож уншиж бай. Тэрнээс илүү их уншвал нүд нь өвдөнө, хараа муудна” гэсэн.

-Уншсан номоо ангийнхандаа ярьж өгдөг үү?

       -Үгүй ээ. Би ярьж өгөхөөс ичээд байдаг юм. Хүүхдүүд намайг шоолбол яах юм бэ. Тэгээд ч манай ангийн хүүхдүүд өөрсдөө ном их уншдаг. Та мэддэггүй юм уу.

-“Тэргүүний уншигч – Нацагдорж тэмдэгтэн” медаль нь таалагдсан уу?

         -Маш их таалагдсан. Өдөр болгон зүүх нь хаашаа юм бэ, гэхдээ зүүмээр санагдсан үедээ зүүнэ ээ. Нээрээ шагнал авах үеэр надад номын эмчийн зөвлөгөө өгсөн. Хүүхдийн төв номын сан гэдэг асарт эмээ бид хоёрыг урьсан юм. Тэгээд надад номоо хэрхэн хайр гамтай унших вэ, яав л ном нь урагдахгүй, хуудас нь муухай болохгүй байх вэ гэдгийг зааж өгсөн. Тэгээд бас “Чи их хөөрхөн хүү байна шүү. Ном их уншаарай” гээд номын хавчуурга бэлэглэсэн.

-Ярилцсанд баярлалаа. Илүү их ном уншиж, сайн хүн болоорой?

        -Найзуудад маань намайг танилцуулж байгаад баярлалаа. Ийм том шагнал авсан болохоор хичээх болно оо. Бас надтай адилхан зөндөө найзуудыгаа номтой нөхөрлөж, ном сайн уншаарай гэж хэлье. Хэрвээ бүгдээрээ ном уншаад байвал том болохдоо мундаг хүн болж, эх орноо хөгжүүлж чадна шүү дээ.