ШИНЭ САЛХИ

Г. Жавхлантгарьд:
Гэрэлт ирээдүй- Шинэ танил

2021-07-30, 748

Намрын модод "бөмбөр" болсон энэ үед бид дотуур шинэлэг зүйлийг мөрөөсөх нь элбэг. Навч, мод, нар гээд бүгд өнгө хувирч байгаа энэ өдрүүдэд салхийг жинхэнээсээ нэг амсаж үзэх хүсэл төрнө. Ийм цагийн эхэнд Эргэлт.мн мэдээллийн сайт яруу найргийн шинэ салхи үүтгэж байна.

ХҮРЭЛХҮҮГИЙН БОЛОРТУЯА

Түүнийг Хүрэлхүүгийн Болортуяа гэдэг. Тэрбээр "ЭСВЭЛ" хэмээх чөлөөт сэтгэлгээний бүтээл хэвлүүлсэн билээ. Ийм өвөрмөц нэртэй ном манай утга зохиолд өмнө мэндлээгүй болов уу. Мэндлээгүй үедээ л сэхээ орсон мэт түүнийх шиг чөлөөт сэтгэлгээт бүтээл бид цөөхөн унших биз ээ. Мөн Х.Болортуяа нь чөлөөт бөхийн тамирчин бөгөөд олимпын тэнгэрт эх орныхоо тугийг мандуулахаар Токиог зорьсон.

***

Би харж байна

Толь руу

Үгүй бол толь надруу

Түүн дотор танил нэг дүрс

Хоёр нүд байх ч дөрөв юм шиг

Хүрэхэд хайр үгүй бол үхэл ч юм шиг

Тийм саармаг мэдрэмж

Би толины урд амьсгална

Мөн толин дотор

Би инээмсэглэхэд тэр инээмсэглэнэ

Би түүнд итгэдэггүй

Худалч юм шиг

АЛТАНБАЯРЫН АЗСАЙХАН

"Энэ олон замын хаагуур нь явах вэ" гэдэг шиг оюун санааны олон гудамжны бас нэгэн өвөрмөц гэрэлт гудамж бол түүний нэрээр овоглосон “16 дугаар гудамж” билээ. Мэдээж тэр бол яруу найраг хийгээд ирээдүйн их утга зохиолын салбарт нэгэн гудамж болох биз ээ. Өнөөдөр бидний дунд ийм нэгэн гуниглуу залуу бодол болон алхаж явна. Түүнийг Алтанбаярын Азсайхан гэдэг.

ЭЭЖДЭЭ

Ээжийг дэлгүүрт өртэй болгосон

Энэ гутлыг өмсөөд явахдаа

Харих зам хичнээн холыг мэдэрдэг

Харцны үзүүрт л тордог жижигхэн бор сууц минь

Намайг орхиод холын хол нүүчихсэн юм шиг санагддаг

Худалдагч эгчийн инээмсэглэлээс өөр хүйт даах юмгүй

Сумын бөөний төвийн гадаах модон сандал дээр цуглах

Согтуу ах нарын өнөө л чанга дуу илүү дулаахан байдаг

Харих замыг минь уртасгах ийм учралууд

Шоргоолжны үлгэр мэт

Шоргоолжны үлгэрээсээ ч бяцхан амьдралынхаа

Шоргоолж нь болж амьдрах миний л ээж

ТӨМӨРТОГООГИЙН БЯМБАСҮРЭН

Яруу найрагч Төмөртогоогийн Бямбасүрэн. Гэнэт л цойлон гарч ирсэн түүний шүлгүүд дээд үеийнхээ зарим шүлэгчид хүртэл яруу найргийн тухай ойлгосон ойлголтоо эргэн харахад хүргэсэн мэт санагдана. Олон үг нурших хэрэггүй байх. Харин та “Түүний номыг л олж уншъя” гэж яг одооноос дунших нь зүйтэй.

***

Би дандаа л дуугаа хураасан хүн шиг шүлэг бичье гэж боддог сон

Дуугаа хураасан төрх дур булаам, урууландаа зуусан тамхи хүсэм, халаасандаа нуусан гар атгам...

Хамгийн сайхан нь үг хэлэлгүй хань болж болом...

Би даанч дуугүйд нэвтэрч сураагүй л явна

Ердөө ганц л удаа, голын эрэгт

Есдүгээр сарын агаарт шидэгдэх навчийг харж билээ

Олзоороо тоглох муур адил салхи навчийг сэгсчин хийсгэж

Орчлонгоос тасарсан амиар наадаж байх шиг харагдсан сан

Аясхан гол өлмийд нь бидэртэхэд

Усны гүнээс ус өөрөө цойлон гарч ирээд навчийг тэврэн авахыг надаас илүү хүсэж байх шиг санагдахад

Агшин зуур сэтгэлд минь анир чимээгүй болсон сон

БАЯНМӨНХИЙН МӨНХЧИМЭГ

Ирээдүйд нь итгэ гэж бүх хүн хэлдэггүй ч бүгд хүүхэд байсан. Ирээдүйн тухай бодох, мөрөөдөх сайхан ч, ярих нь тааламжгүй. Зөн совин зөрөх аваас өдрийг шөнө, шөнийг өдөр гэж сэтгэх нь зүйтэй. Сайхан бүхний эхэнд түүнд амжилт хүсье. Хөдөөгийн эгэл суурингийн сурагч түүнийг Баянмөнхийн Мөнхчимэг гэдэг.

Намар ирэх нь дээ

Навчис унах нь дээ

Чамайг санах нь дээ

Нүүдлийн шувууд буцах нь дээ

Нүднээс минь гуниг урсах нь дээ

Чамайг үгүйлэх нь дээ

Навчисын дээгүүр хамт гүйхсэн дээ

Намрыг хамт үдэхсэн дээ

Чамтай хамт нисэхсэн дээ

ШИНЭ САЛХИ