-Түргэн тусламжийн машин дотор гурван килограмм жинтэй хүү эсэн мэнд амаржжээ-

Г.Энхцогт гэх залуу эмч түргэн тусламжийн автомашин дотор эх барьж авчээ. Тэрбээр уржигдар хотын төвөөс 20 гаруй километрийн зайтай Тахилт руу дуудлагад явж байгаад эх, хүү хоёрыг эсэн мэнд амаржуулсан байна. Нийслэлийн яаралтай түргэн тусламжийн их эмч Г.Энхцогттой ярилцлаа.

-Түргэн тусламжийн машинд эх барьж авчээ. Энэ үйл явдал хэзээ болон тухайн үед юу болсон талаар ярихгүй юу?

-Өчигдөр (уржигдар) шөнө 01:00 цагийн үед Сонгинохайрхан дүүрэг, Тахилт хэсэг рүү хоёр дуудлага аваад явж байсан юм. Нэг нь “Жирэмсэн эмэгтэй таван минутын зайтай өвдөлт өгөөд байна” гэсэн дуудлага байсан. Төрөх дуудлага болохоор яаралтай очихоор явж байлаа. Тухайн эмэгтэй 103-т дуудлага өгөөд, ээжтэйгээ цуг машинтай хотын төв рүү гарсан юм билээ. Биднийг Сонгинохайрхан дүүргийн 33 дугаар хороо, “Жаргалант” хүнсний дэлгүүрийн ойролцоо очиход машиныхаа аваарын гэрлийг асаачихсан зогсож байв. Түргэний машинд зөөвөрлөж суулгахад төрөхийн хоёрдугаар үе шат эхэлчихсэн байсан. Тэгээд шаардлагатай арга хэмжээг авч, машиндаа төрүүлсэн. Төрөх эмнэлэг рүү явах хугацаа байхгүй байсан учраас ийм шийдвэр гаргасан даа.

-Амаржсан эхийн төрөх хугацаа нь болчихсон байсан юм уу?

-Тиймээ, болчихсон байсан юм билээ. Тулгаж түргэн дуудсан болохоор яах ч аргагүй машинд төрүүллээ. Уг нь эх 20 минутын зайтай өвдсөн үед түргэх дуудах юм уу, эсвэл эмнэлгийн газарт хүрч очих ёстой байдаг юм. Гэтэл тэр эмэгтэй таван минутын зайтай буюу төрөлтийн үе шат явагдаж эхэлсэн үед түргэн дуудсан байна лээ.

Түргэний машинд зөөвөрлөж суулгахад төрөхийн хоёрдугаар үе шат эхэлчихсэн байсан. Тэгээд шаардлагатай арга хэмжээг авч, машиндаа төрүүлсэн. Төрөх эмнэлэг рүү явах хугацаа байхгүй байсан учраас ийм шийдвэр гаргасан даа.

-Төрөх явцад хүндрэл гарсан уу?

-Үгүй ээ. Эх барьж авахаасаа өмнө шаардлагатай дусал, тариаг хийж амжсан байсан. Тухайн эхийн тав дахь төрөлт байсан юм билээ. Түргэний машинд суулгахад л савны амсар хэдийн нээгдэж, төрөхөд бэлэн болчихсон байсан. Ер нь хүндрэлгүй, хурдан төрдөг гэсэн. Төрүүлээд, 03:00 цаг өнгөрч байхад төрөх эмнэлэгт хүргэж өгсөн. Эх хүндрэлгүй амаржиж, хүү эрүүл төрсөнд үнэхээр их баярласан.

-Таны эх барьж авсан ээж, хүүгийн биеийн байдал сайн байгаа юу. Тантай дараа нь холбогдсон уу?

-Надад маш их баярласан, талархсанаа илэрхийлсэн. Эх, хүүгийн биеийн байдал сайн байгаа. Төрөхийн дараах хүндрэл байгаагүй учраас тэнхрээд эмнэлгээс гарах байх. Баярлалаа гэдэг үгнээс сайхан үг хаана ч байхгүй шүү дээ. Би ч эх, хүүгийн бие сайн байгаад баяртай байгаа. 

-Хэдэн жил түргэний эмчээр ажиллаж байгаа вэ. Өмнө нь эх барьж авч байсан уу?

-Би яаралтай түргэн тусламжийн эмчээр ажиллаад хоёр жил орчим болж байна. Сургуулиа төгсөөд л 103-т ажилд орсон. Олон дуудлагад явж байсан ч анх удаа эх барьж авлаа. Машинд эх барьж авахад амаргүй юм байна. Туслах хүн байхгүй болохоор бага зэрэг хэцүү байсан. Ийм дуудлагын үед жолооч маань тусалдаг ч төрөх үе шат эхэлчихсэн байсан учраас машины хаалга онгойлгох боломжгүй байсан. Харин амаржсан эхийн ээж нь хамт явж байсан болохоор их тус боллоо.

-Эрэгтэй, дээрээс нь залуу эмч болохоор сандарч, тэвдсэн үү?

-Түргэн тусламжийн автомашин дотор анхан шатны бүх хэрэгсэл байдаг болохоор санаа зовох зүйлгүй байсан. Хүйн хайч хүртэл байдаг шүү дээ. Тухайн үедээ ч сандрах завгүй байлаа. Эх, хүү хоёрыг эмнэлэгт хүргэж өгснийхөө дараа жаахан айлаа. Гэхдээ ажил үүргээ гүйцэтгэх ёстой учраас сандрах, айх гэдэг зүйлийг мэдэхгүй шүү дээ. Түргэний эмч нар чинь ямар ч нөхцөлд ажиллах чадвартай байх ёстой.

 Тухайн эхийн тав дахь төрөлт байсан юм билээ. Түргэний машинд суулгахад л савны амсар хэдийн нээгдэж, төрөхөд бэлэн болчихсон байсан. Ер нь хүндрэлгүй, хурдан төрдөг гэсэн.

-Таны явж байсан дуудлагуудаас хамгийн хэцүү нь ямар дуудлага байсан бэ?

-Өндрөөс хүн унасан, түлэгдэж бэртсэн, зам тээврийн осолд орсон гээд олон хүнд дуудлагад явдаг. Хүний амь нас дээсэн дөрөөн дээр байгаа дуудлага бүр л хэцүү. Цаг хугацаа уралдаж л хүний амь аврах хэрэгтэй болно. Хэрэв бид жаахан л хоцорвол биднийг хүлээж байгаа хүний эрүүл мэнд хэцүүднэ.

-Эмчээр ажиллаж байгаа энэ хоёр жилийн хугацаанд хүний амь аварсан хэчнээн дуудлагад явсан бэ. Эмч хүний хамгийн жаргалтай хугацаа нь хэзээ байдаг юм байна?

-Тоолж үзээгүй ээ. Бид 24 цаг ажиллаад, 48 цаг амардаг. Осол, эндэгдэлгүй хүмүүсээ эмнэлэгт хүлээлгэж өгөх сайхан. Биеийн байдал нь маш хүнд түргэнээр эмнэлэгт очсон хүмүүс амьдрах юм бол бүүр ч сайхан юм билээ.

Биеийн байдал нь маш хүнд түргэнээр эмнэлэгт очсон хүмүүс амьдрах юм бол бүүр ч сайхан юм билээ.

-Та багаасаа л эмч болохыг мөрөөддөг байсан уу?

-Тиймээ, багаасаа л эмч болохыг мөрөөддөг хүүхэд байлаа. Аав, ээж хоёр маань намайг байнга дэмжиж, ард минь байдаг. Шантрах ч гэдэг юм уу, хэцүү байвал миний аав, ээж хоёр хүүгийнхээ ард талд байдаг болохоор ажлаа сайн хийж чаддаг. Залуу эмч учраас суралцах зүйл их бий. Илүү туршлагатай, сайн эмч болохын төлөө л өдөр бүр зүтгэдэг дээ.

-Ярилцсанд баярлалаа. Ажилд нь амжилт хүсье.

-Баярлалаа.