-Томоохон зах худалдааны төвүүд хоёрдугаар сарын 16 хүртэл ажиллахгүй-

Засгийн газар, Улсын онцгой комиссоос 2021 оны хоёрдугаар сарын 11-нээс буюу өнөөдөр 06:00 цагаас эхлэн 12 хоног хатуу хөл хорио тогтоохоор шийдвэрлэсэн. Түүнчлэн Нийслэлийн Засаг дарга бөгөөд Улаанбаатар хотын захирагч Д.Сумъяабазар бүх нийтийн бэлэн байдлын зэрэгт шилжсэн хугацаанд худалдаа үйлчилгээний талаар авах зарим арга хэмжээний тухай захирамж гаргажээ.  

Тус захирамжид “Ковид-19” халдварын өвчинтэй тэмцэх, халдварын эрсдэлийг бууруулах арга хэмжээ авах зорилгоор бүх нийтийн бэлэн байдлын зэрэгт шилжсэн хугацаанд хүнсний томоохон зах, худалдааны төвүүдийн ажиллах цагийн хуваарь, бараа бүтээгдэхүүний татан авалт хийхгүйгээр хангалттай хэмжээгээр нөөцөлж, хүнсний аюулгүй байдлыг хангаж ажиллахыг хүнсний худалдаа эрхлэгч аж ахуйн нэгж иргэдэд үүрэг болгосон байна. Тодруулбал, хүнс худалдааны 41 зах, хоёрдугаар сарын 16-н хүртэл амарч, 4297 хүнсний дэлгүүр үйл ажиллагааг нь хязгаарлахгүй байгууллагад багтаж буй учраас хөл хорионы хугацаанд ажиллах юм.

Бүх нийтийн бэлэн байдалд шилжсэн хугацаанд томоохон зах, худалдааны томоохон төвүүд дараах хуваарийн дагуу үйл ажиллагаагаа явуулна.