Баянгол дүүргийн нэгдүгээр хороо Богд-Ар хорооллын 11А байрны наймдугаар давхарт гал гарч байна гэх дуудлага өчигдөр 16:18 цагийн үед Нийслэлийн Онцгой байдлын газарт бүртгэгдсэн. Дуудлагын дагуу Чингэлтэй дүүргийн Онцгой байдлын хэлтсийн Гал түймэр унтраах аврах ангийн 10 дугаар ангийн алба хаагчид ажиллаж, 112 хүүхэд, утаажилтын бүсээс 11 хүүхэд 43 том хүн нийт 66 хүний амь насыг аварсан. Тэгвэл бид тус байрны нөхцөл байдал хэр байгааг сурвалжлахаар газар дээр нь очсон юм.

Биднийг очиход 11А байр бүхэлдээ тог цахилгаангүй, наймдугаар давхрын айлууд эзэнгүй, Нэг давхраас хамгийн дээд давхар хүртлээ үнс нурам, тортогонд дарагдсан байдалтай байлаа. Галын шалтгааныг урьдчилсан байдлаар кабель холбооны босоо сувагчлалаас үүссэн гэж үзэж байгаа. Азаар кабель холбооны босоо сувагчлалын хажуугийн айлууд руу гал ороогүй байна. Тус байр нийтдээ 12 давхар бөгөөд галын улмаас хамгийн дээд давхар хүртлээ утаажсан байна. Иймд тус байрны оршин суугчид зочид буудал, хамаатан саднындаа хоног өнгөрүүлсэн аж. Түүнчлэн угаарын улмаас гэр нь бүхэлдээ тортог болжээ. Үүнээс илүүтэй тог цахилгаангүй байгаа нь оршин суугчдад тулгамдаж буй асуудал болоод байна.