Humanz.mn сайтын үүсгэн байгуулагч, сэтгүүлч М.Баасандэлгэрийн “Миний өмссөн гутал” номыг уншигч танд танилцуулж байна. Энэхүү ном нь “Өмсдөг хайр”, “Одоо цагийн эмэгтэй”, “Аавын гэр”, “Ганцхан”, “Чөрөнхий”, “Том болсон өдөр”, “Миний үр” тэргүүтэй дурсамж, хөргөөс бүтжээ.

       Тэрбээр номынхоо тухай “Надаас өөр хэн ч анзаарч хараагүй, миний сэтгэлд үүрд дурсагдах аавын авч өгсөн түрийтэй, бор шаргал гутал шиг энгийн бөгөөд үнэтэй амьдралаа уншигч танд хуваалцаж байна. Миний гутлыг надаас өөр хэн ч өмсөхгүй. Миний гутал надад л эвтэйхэн бас тухтай. Хүн бүр өөрийн гутлаа өөд нь татаж өмсдөг. Шинэ гутал авлаа ч хуучнаа тэр болгон хаяад байдаггүй. Яг л амьдрал шиг. Амьдралд мартагддагүй дурсамж байдаг ч зарим нь мартагддаг. Миний амьдрал бол минийх. Хэн ч над шиг миний амьдралыг харж, бүтээж, үргэлжлүүлж, туулж чадахгүй...” гэжээ.

Ингээд уншигч танд түүний номоос дараах эшлэлүүдийг онцлон хүргэж байна.

• “...Хичээлдээ шинэ гутлаа өмсөж явна гэхээр нойр хүрэхгүй хөрвөөсөөр үүр цайлгасан миний хүүхэд нас. Өнөөдрийг хүртэл би тийм загварлаг, дулаахан гутал авч үзээгүй...”

• “Одоо цагтаа оршихыг ээжээсээ хардаг юм аа...”

• “...Сүүлийн үед би ээжийгээ “Уул эмэгтэй” гэж төсөөлдөг болсон. Тэр чимээ гаргадаггүй, хөдөлдөггүй, гомдоллодоггүй. Өөртөө ирсэн бүхнийг шингээж амьдарсан. Ээжийгээ харахаар санаа амраад л. Ээжтэйгээ ярихаар уулын орой дээр салхи амссан мэт болоод л. Үргэлж түшигтэй, гэхдээ чимээгүй...”

• “Аавын минь гэр шиг амар тайван, халуун дулаан газар үгүй. Тооно руу ширтэхэд багын минь цагаахан үе тодорч, тэр үеийн дурсамж сэтгэл зүрх бүлээцүүлнэ...”

• “...Ангидаа ганцаархнаа эмэгтэй. ШУТИС-ийн 07:40 цагийн хичээлд нэг ч хоцорч байгаагүй гэж хэлэхэд болохоор хүн бол манай дүү...”

• “...Одоо бол би өөрийн мөрөөдлийн компанийнхаа захирал нь. Өөрийнхөө үгэнд орж хэзээ ч бууж өгөөгүй зүтгэсэн нь зөв болсон байна шүү.”

• “...Би хэзээ ч ийм залуутай үерхэхгүй гэж бодоод 100 хонолгүй хөтлөлцөөд гүйснээ бодохоор эмэгтэй хүн дасаж дурладаг гэдэг үгийн биелэл байх...”

• “...Одоо болохоор хайр хүрдэг юм. Нэг их сайн биш ч гэлээ хийе, бүтээе гэсэн сэдлээрээ үргэлж шагнуулж иржээ, энэ амьдралд...”

• “...Заримдаа чин сэтгэлээсээ хүссэн бүхэн зөв зам мөрөө олоод эвлэх л сайхан...”

• “Гунигтай, тийм ч хангалуун биш, бусдад гайхуулж яриахаар жаргалтай сурагч охин байгаагүй ч зүгээр дээ...”