Нийгмийн даатгалын шимтгэлийг хоёр хувиар нэмж, 26 хувь болгосон талаар НДЕГ-аас мэдээллээ. Ингэснээр ажил олгогчийн зүгээс 13.5 даатгуулагчийн зүгээс 12.5 хувийн шимтгэл төлөх аж.

Энэ талаар Нийгмийн даатгалын ерөнхий газраас тодруулахад “Нийгмийн даатгалын тухай хуульд  2017 оны дөрөвдүгээр сарын 14-нд нэмэлт өөрчлөлт оруулсан. Энэ хуулиар тэтгэврийн даатгалын шимтгэлийн хувь хэмжээг 2017 онд мөрдөж байсан хуулиар ажил олгогч, даатгуулагч тус бүр долоон хувийн шимтгэл төлдөг байсныг 9.5 хувь болгож нэмэгдүүлсэн. Энэ нэмэгдлийг хэрхэн хэрэгжүүлэх талаар Нийгмийн даатгалын  хуулиудыг хэрэглэх журмын тухай хуульд тусгайлан зааж өгсөн байгаа. Энэ хуулийн дагуу тэтгэврийн даатгалын шимтгэл ажил олгогч, даатгуулагч тус бүр долоон хувиар төлж байсныг 2018 онд нэг функтээр, 2019 онд 0.5, 2020 онд нэг функтээр буюу гурван жилийн хугацаанд 2.5 функтээр нэмэгдүүлэхийг хуульд заасан байгаа. Үүнийг Хөдөлмөр нийгмийн хамгааллын яам болон Нийгмийн даатгалын ерөнхий газраас 2018, 2019 онд хэрэгжүүлж ажилласан. 2020 онд нэмэгдэх ёстой байсан хоёр функтийн нэмэгдлийг Монгол Улсын Их хурлаас 2019 оны арванхоёрдугаар сарын 30-ны өдөр хуульчилж, энэ шимтгэлийн нэмэгдлийг нэг жилээр буюу 2021 оныг хүртэл хойшлуулан баталсан. Үүнтэй холбоотойгоор 2021 оны нэгдүгээр сараас эхлээд тэтгэврийн даатгалын шимтгэлийн хувь хэмжээ хоёр функт буюу ажил олгогчид нэг, даатгуулагчид нэг функтээр нэмэгдсэн байгаа. Үүнийг Нийгмийн даатгалын ерөнхий газар болон ХНХЯ хэрэгжүүлж ажиллаж байна” гэв.

2021 оны нэгдүгээр сараас тэтгэврийн даатгалын шимтгэлийн хувь хэмжээ хоёр функт буюу ажил олгогчид нэг, даатгуулагчид нэг функтээр нэмэгдсэн

Түүнчлэн “Монгол Улсад нийт 48.9 мянга буюу 49 орчим мянган аж ахуйн нэгж байгууллага нийгмийн даатгалын байгууллагад тайлан өгдөг. Өнгөрсөн онд коронавируст цар тахлын улмаас үйл ажиллагаа нь доголдсон аж ахуйн нэгж байгууллагыг эдийн засгийн хувьд дэмжих зорилгоор УИХ-аас 2020 оны дөрөвдүгээр сард нийгмийн даатгалын шимтгэлээс чөлөөлөх, ажилгүйдлийн даатгалын сангаас дэмжлэг үзүүлэх тухай хуулиудыг баталсан. Үүний дагуу нийгмийн даатгалын байгууллагууд энэ хуулийн хэрэгжилтийг 2020 оны 10-12 дугаар сард хэрэгжүүлж ажилласан. Үүнд 49 мянга орчим байгууллагаас 38.4 мянган ажил олгогчийн 410 мянган даатгуулагч, 161 мянган сайн дурын даатгуулагчийн нийт 672 орчим тэрбум төгрөгийн шимтгэлийг чөлөөлсөн. Энэ хуульд 2020 оны арванхоёрдугаар сард нэмэлт өөрчлөлт оруулсантай холбоотойгоор шимтгэлээс чөлөөлөгдсөн 38.4 мянган ажил олгогчийн тэтгэврийн даатгалыг ажил олгогч, даатгуулагч тус бүрт нь 8.5 функт, эрүүл мэндийн даатгалыг хоёр функтээр төлүүлэхээр хуульчилсан байгаа. Тэгэхээр нийт 21 хувиар шимтгэл төлөхөөр 5-7 пунктээр хөнгөлөлтөд хамрагдана гэсэн үг. Энэ нь 2021 оны долдугаар сарын 1-ныг хүртэл хэрэгжинэ. Шимтгэлийн чөлөөлөлтөд төрийн өмчит болон орон нутгийн өмчит байгууллагууд хамрагдахгүй” гэв.