Засгийн газраас шийдвэрлэсэн малчдад үзүүлэх тэжээлийн дэмжлэг туслалцааны хүрээнд одоогийн байдлаар Өвөрхангай аймагт 272 тонн, Баянхонгорт 280 тонн, Говь-Алтайд 330 тонн хүчит тэжээлийг хүргүүлээд байна.  

Засгийн газрын тогтоолоор өвөлжилт хүндэрсэн Говь-Алтай, Өмнөговь аймгийн зарим сум, Өвөрхангай, Баянхонгор, Дундговь аймгийн бүх сум болон отроор явж буй малчин өрхөд хүнс тэжээлийн дэмжлэг үзүүлэхээр шийдвэрлэсэн юм. Энэ дэмжлэгээр ХХААХҮЯ-ны дэргэд Дэлхийн банкны санхүүжилтээр хэрэгжиж байгаа “Мал аж ахуйн эдийн засгийн эргэлтийг нэмэгдүүлэх” төслөөс нэр бүхий таван аймгийн 40  мянга гаруй малчин өрхөд нийт таван сая ам.доллар зарцуулж буй юм. 

Түүнчлэн ХХААХҮЯ-ны Төрийн нарийн бичгийн дарга Т.Жамбалцэрэн, НҮБ-ын Хүнс, хөдөө аж аухйн байгууллагын Монгол дахь суурин төлөөлөгч Винод Ахужа нараар ахлуулсан баг  энэ сарын 17-20-нд Өвөрхангай, Баянхонгор, Говь-Алтай, Төв аймагт ажиллаж, өрхийн мал сүргийн өвөлжилтийн нөхцөл байдал, ахуй амьдралтай танилцаж тэжээлийн тусламж хүргэжээ.