Монгол Улсын Шадар сайд, УОК-ын дарга Я.Содбаатар Цагаан сарын баяраар хатуу хөл хориог тодорхой хугацаанд тогтоох талаар мэдээллээ. Тэрбээр "Бүх нийтийн бэлэн байдлын зэргийг өндөржүүлсэн байдлын зэрэгт шилжүүлэх, хэсэгчлэн хязгаарлалт тогтоох, үйлчилгээний байгууллагуудыг нээж хаах нь зөвхөн УОК-ын шийдэх зүйл биш. Мэргэжлийн хүмүүсийн саналыг сонсож, дараах таван гол шалгуурыг харгалзан шийдвэрээ гаргадаг. Үүнд:

• Шинээр бүртгэгдсэн голомтын тоо
• Шинэ тохиолдлын тоо
• Халдварлуулах түвшин
• 10 мянган хүн амд ноогдож байгаа өвчлөл
• Лабораторийн шинжилгээний эерэг хувь зэрэг багтана.

Одоогоор бизнес, үйлчилгээний байгууллагуудаа дэмжин бага хэмжээгээр сулруулж байна. Хэрэв өвчин цааш тархах, байдал хүндэрвэл хатуу хөл хориог тогтооно. Дэлхийн бүх улсад нь тус арга хэмжээг авч байна. Томоохон үндэсний баярын үеэр хатуу хөл хориог тогтоодог. Тиймээс Цагаан сарын баяраар хатуу хөл хориог тодорхой хугацаанд тогтооно" гэлээ.