Хөвсгөл аймгийн Ханх суманд өнөөдөр буюу нэгдүгээр сарын 12-ны үүрээр зургаан удаа газар хөдөлж, иргэдэд хүчтэй мэдрэгсэн талаар Одон орон, геофизикийн хүрээлэнгээс мэдээллээ. Тодруулбал, Улаанбаатарын цагаар 05:32 цагт 6.5 магнитуд, 05:41 цагт 5.1 магнитуд, 05:47 цагт 4.6 магнитуд, 06:02 цагт 5.3 магнитуд, 06:10 цагт таван магнитуд, 07:02 цагт 5.6  магнитуд хүчтэй газар хөдөлжээ.

Харин Хөвсгөл аймгийн Ханх суманд хамгийн их чичирхийлэл мэдрэгдсэн байна. Энэ талаар Хөвсгөл аймгийн Засаг дарга Ш.Идэрбаясгалангаас тодруулахад “ОХУ-тай хил залгаа оршдог Ханх суманд 30 гаруй удаа чичирхийлэл мэдрэгдсэн. Газар хөдлөлт 60 гаруй минут үргэлжиллээ. Ингэхдээ 10 гаруй удаагийн чичирхийлэл хүчтэй мэдрэгдэж, ганц, хоёр айлын байшингийн цонх хагарсан. Түүнчлэн 1-2 байшингийн хана цуурсан мэдээлэл авлаа. Одоогийн байдлаар хүн бэртэж, гэмтсэн зүйл байхгүй. Мөн Мөрөн хотод чичирхийлэл мэдрэгдсэн. Чичирхийлэл хүчтэй мэдрэгдсэн учраас орон сууцнуудыг шалгах үйл ажиллагаа үргэлжилж байна. Нарийн мэдээлэл аваагүй учраас тодорхой мэдээлэл өгөх боломжгүй” гэлээ.