Эрүүл мэндийн яамнаас мэдээлэл хийх үеэр сэтгүүлчид асуулт асуулаа. Энэ үеэр "18 байгууллагаас бусад байгууллагын үйл ажиллагаа хэвийн явуулсантай холбоотой ажилчдыг PCR  шинжилгээнд хамрагдах шаардлагагүй" гэв.

Энэ талаар ЭМЯ-ны Ахлах шинжээч Д.Нарангэрэл "Бүх ажилчдыг PCR өгөх шаардлагагүй гэж үзэж байгаа. PCR-ын шинжилгээ бол таныг коронавирусийн халдвар аваагүй гэсэн баталгаа биш. Халдвар аваагүй байж болно, эсвэл нууц үедээ байх магадлал ч бий. Харин тэрний оронд тухайн хүмүүсийг амны хаалт зүүж, ариутгал халдваргүйтлийг сайн хийх, бөөгнөрөл үүсгэхгүй байхад анхаарах нь  PCR өгөхөөс илүү үр дүнтэй" гэв.

Мөн энэ үеэр манай улс гурван төрлийн вакциныг бүртгэсэн асуудлаар тодруулга авсан юм. Тэрбээр "Манайх хоёр зарчим баримтлан вакцин авч байгаа. Нэгдүгээрт, ДЭМБ-аас хүлээн зөвшөөрсөн, хоёрдугаарт, хүйтэн хэлхээний байх. Тэгэхээр ДЭМБ-аас нэг вакцины зөвшөөрөл авсан байгаа" гэв.