ЭМЯ: Эмч, эмнэлгийн 100 гаруй хүн өвчилсөн

Б. Бадралмаа:
Монголчуудын амьдрал- Мэдээ мэдээлэл

2021-01-09, 883

Эрүүл мэндийн яамны мэдээллийн үеэр сэтгүүлчдийн асуултад хариуллаа.

-Баянзүрх дүүргийн Нэгдсэн эмнэлгийн голомтыг хумьж чадсан уу?

-Голомтод батлагдсан тохиолдлоос хойш 28 хоног хяналт тавих ёстой. Баянзүрх дүүргийн тухайд арванхоёрдугаар сарын 6-нд анхны голомт бүртгэгдсэн. Өнөөдрийг хүртэл голомтын тандалт үргэлжилж байгаа. Харин голомтын цөм болсон Нэгдсэн эмнэлгийн эмч, эмнэлгийн ажилтан, өвчтөн, хэвтээд гарсан хүмүүсийн ойрын болон дам хавьтлыг хумьсан. Үргэлжилсэн гинжин хэлхээнээс нь голомт гарч байна. Гэр бүлийн хоёр, гурав дахь голомт үргэлжилж өнөөдөр энэ голомтоос хоёр хүнээс халдвар илэрсэн. Энэ бол маш том голомт. Эндээс нийт 326 тохиолдол бүртгэгдсэн.

-Тэтгэвэрт гарсан эмч нарт бэлэн байх чиглэл өгчээ. Энэ ямар учиртай вэ. Ер нь эмнэлгийн хэчнээн эмч, ажилтан халдвар авсан бэ?

Эмч, эмнэлгийн 100 гаруй хүн өвчилсөн. Эмнэлгийн тусламж үйлчилгээ үзүүлж байгаад халдварт өртсөн явдал бий. Ер нь хүний нөөцөө бүрдүүлэх, дайчлан ажиллах төлөвлөгөө гэж бий. Энэ төлөвлөгөөний дагуу бид эмнэлгийн байгууллага, анагаахын сургууль төгссөн оюутнууд, эмч ажилчдаа нөөцөнд байлгана.

-Эрүүл хүмүүс тусгаарлах байрнаас халдвар авч байгаа гэх мэдээллүүд бий. Энэ талаар тодорхой мэдээлэл өгөөч?

-Ойрын хавьтлыг 14 хоног тусгаарлаж байгаа. Зүгээр байж байгаад тусгаарлалтын байрнаас халдвар аваад байна гэх мэдээлэл байгаа. Гэхдээ энэ вирус агаар дусал, амьсгалын замаар дамжиж биед орно. Ингээд үржиж, өвчин үүсгэнэ. Дараа нь дахин дамжиж, эрүүл биед шилжин өвчин үүсгэдэг. Энэ нь халдварт өвчний нууц үеийн хугацаа болно. Тиймээс халдварын нууц үеийн хугацаа 1-14 хоног гэж үзэж байгаа. Хавьтал болсноос 14 хоногийн хугацаанд вирус илэрч болзошгүй. Тэрнээс биш халдвар тусгаарлах байрнаас аваад байгаа юм биш.

ЭМЯ: Эмч, эмнэлгийн 100 гаруй хүн өвчилсөн