-Дүүрэг дүүргээр хэсэгчлэн "тэг" зогсолт хийж болзошгүй нь-

Олон нийтийн сүлжээгээр нийслэлд тэг "зогсолт" хийж магадгүй гэх шуум ойрын өдрүүдэд тархсан. Үүнд УОК-ын Шуурхай штабаас өчигдөр тайлбар хийж, "тэг" зогсолт хийхгүй талаар мэдэгдсэн юм. Тодруулбал, Шуурхай штабын дарга, хурандаа Б.Ууганбаяр “Нийслэлийн 410 мянган өрхөд коронавирусийн халдварын шинжилгээ авах судалгаа хийж байгаа. Цар тахлын хэд хэдэн голомт илрээд байгаа ч Улаанбаатар хотод "тэг" зогсолт хийх боломжгүй. Иймд олон нийтийн сүлжээнд гарсан ташаа мэдээллээр сандарч үймэхгүй байхыг хүсье” гэсэн юм. Гэтэл өнөөдөр Баянгол дүүргийн V, VI хороонд хөдөлгөөн хязгаарлаж, "тэг" зогсолт хийв. Зайлшгүй ажиллах шаардлагатай 15 салбарынхан хүртэл гэрээсээ гарах боломжгүй боллоо. Тус хороодын хэд хэдэн байрнаас халдвар голомтлон тархаж байгаа учраас иргэдийг шинжилгээнд хамруулах зайлшгүй шаардлага үүсэж, ийм арга хэмжээ авсан юм.

Хэдийгээр одоохондоо хоёрхон хороонд хөдөлгөөн хязгаарласан ч цаашид дүүрэг дүүргээр нь хэсэгчлэн "тэг" зогсолт хийж магадгүй талаар албаны эх сурвалж дурдлаа. Иргэдээ ийн "хорьж" байгаад шинжилгээнд хамруулах чиглэлийг дүүргийн Засаг даргад үүрэгдсэн байж мэдэх юм. Түүнчлэн зайлшгүй ажиллах шаардлагатай байгууллагын албан хаагчдад "тэг" зогсолтод бэлэн байх үүрэг өгч, долоо хоногийн хугацаатай ажлын байран дээрээ ажиллах чиглэл ирүүлсэн тухай мэдээлэл байна. Ингэхдээ энэ үеэр ажиллах албан хаагчдын бүрдүүлэх зүйлсийн жагсаалтыг гаргаж, хүмүүсийг хувийн бэлтгэлээ хангах үүрэг өгсөн гэнэ. Тодруулбал, тэдэнд иргэний үнэмлэх, ажлын бичиг баримт, аяны хөнжил, гудас, цагаан хэрэглэл, аяга, халбага, усны сав, гар чийдэн, гар нүүрийн алчуур, гар ариутгагч, углааш, ажлын бээлий, ариун цэврийн хэрэгсэл, сахлын татуурга, амны хаалт, шархны тос, өвчин намдаах эм, шарх цэвэрлэх бодис тэргүүтэй 30 нэр төрлийн зүйл бэлдэх үүрэг өгөөд байгаа аж.

Тэгэхээр албаныхны "тэг" зогсолт хийхгүй гэж иргэдийг тайвшруулж байгаад гэнэт өнөөдөр өглөөнийх шиг хөдөлгөөн хязгаарлаж болзошгүй нь. Мөн эх сурвалжийн мэдээлж буйгаар “Дохио өгсөн цагт "тэг" зогсолт хийх боломжтой. Хорооны ажилтнуудыг ажлын байрандаа долоо хоног ажиллах боломж бүрдүүлнэ гэсэн. Тэгэхээр хэзээ л бол хэзээ тэг зогсолт хийж магадгүй” гэлээ.