Жүжигчин А.Ганчимэг төрийн байгуулагын нэр дээр бүртгэлтэй QR код бүхий автомашин унаж, хөл хорионы дэглэм зөрчин замын хөдөлгөөнд оролцсон гэх мэдээлэл гараад байгаа.

Тодруулбал, жүжигчин А.Ганчимэг нь Харилцаа холбоо, мэдээллийн технологийн газрын нэр дээр QR код авч, автомашинаараа хөдөлгөөнд оролцсон гэнэ. Одоогоор QR код эзэмшиж байгаа иргэдийг тухайн байгууллагад харьяалагддаг эсэхийг нягтлан шалгаж байгаа аж.

Тэгвэл уг асуудалд жүжигчин А.Ганчимэг өөрийн цахим хуудсаараа дамжуулан тайлбар хийжээ. Тэрбээр “QR кодоор хөдөлгөөнд оролцсон гэсэн мэдээлэл гараад байна. Уг нь хөл хориог дахин чангатгаж, хатуу дэглэм тогтоосон өдрөөс хойш нэг ч удаа гэрээсээ гарч, автомашинтай  хөдөлгөөнд оролцоогүй. Төрийн байгууллагын код авсан гэж байгаа нь манай аавын машин, миний нэр дээр байдаг юм. Аав, ээждээ авч өгөөд нэрийг нь шилжүүлээгүй байсан. Тэр машиныг манай төрсөн дүү /Харилцаа холбоо мэдээллийн технологийн газарт ажилладаг/ өөрийнхөө ажилд унадаг. Түүнээс биш код аваад гадуур яваагүй. Иргэний хувьд халдвар хамгааллын дэглэмээ маш сайн баримталж байгаа” гэжээ.

Ташрамд дурдахад, хатуу хөлд хорионы дэглэм тогтоогоод байгаа энэ үед зайлшгүй ажиллах шаардлагатай 13 салбараас гадна хүүхэд хамгаалал болон банкны салбарыг нэмэгдүүлж, нийт 15 салбарын автомашин QR бүхий тусгай зөвшөөрөл авч замын хөдөлгөөнд оролцох эрхтэй байгаа. Харин зөвшөөрөгдсөн чиглэлээс бусад чиглэл болон иргэдийн автомашинаар зорчих эрхийг хязгаарлаж байгаа юм.