Налайх дүүргийн Онцгой комисс хуралдаж, Улаанбаатар-Налайх чиглэлд зөвшөөрөлтэй тээврийн хэрэгслээр зорчиж байгаа иргэн заавал PCR шинжилгээ өгсөн байх шаардлага тавихаар болжээ. Шинжилгээ өгөөгүй бол "Оргил Налайх" шалган бүртгэх товчоонд иргэдийн бүртгэл хөдөлгөөнд хяналт тавьж буй алба хаагчид нэвтрүүлэхгүй юм.

Энэ талаар Налайх дүүргийн Онцгой комиссын Шуурхай штабаас тодруулахад "PCR шинжилгээний хариу нь 72 цагийн дотор хүчинтэй. Тиймээс тус дүүргээс Улаанбаатар хот руу ажилдаа явдаг иргэдийн хувьд 72 цаг тутамд PCR шинжилгээ өгнө" хэмээв. 

Налайх дүүргийн онцгой комиссоос Улаанбаатар хотын бусад дүүрэгт коронавирусийн халдварын тархалт нэмэгдэж байгаатай холбогдуулан дээрх шийдвэрийг гаргажээ. Өнөөдрийн байдлаар, Налайх дүүрэгт коронавирусээр халдварласан хоёр тохиолдол бүртгэгдээд байна.