Нийслэлийн 309-р цэцэрлэгийн багш дөрвөн настай хүүхдийг зодсон гэх мэдээлэл цахим сүлжээнд цацагдаад байсан билээ. Бид энэ талаар зодуулсан хүүхдийн ээж Ж.Батчимэгээс тодрууллаа.

      Тэрбээр “Хүүхдийн минь хэрэг прокурорт шилжсэн. 309-р цэцэрлэгээс ямар нэгэн хариу, уучлалт гуйсан зүйл хэлээгүй” гэлээ.

      Эргэн сануулахад, Ж.БАТЧИМЭГ: “Хүүхдээ цэцэрлэгээс нь очиж авахад хувцас нь цус болсон байсан. Багшаас нь асуухад “Гэрээсээ ийм хувцастай ирсэн” гэж хариулсан. Тэгээд эрхлэгчээс нь асуухад “Халууцаад хамраас цус гарсан байх” гэсэн.  Харин хүүгээсээ асуухад "Багш хамар руу цохисон" гэж хэлсэн. Мэдээж хүүхэд худал хэлэхгүй шүү дээ. Багш нь өмнө нь удаа дараа зодож, бэртээсэн байсан. Тухайлбал, өнгөрсөн гуравдугаар сард хүү маань “Багш  нуруу руу цохисон, гэхдээ ээж, аавдаа битгий хэлээрэй” гэсэн гэж байсан удаатай. Хүү минь сүүлийн үед цэцэрлэгтээ явахгүй гэж уурлах, түгшсэн байдалтай байдаг болсон. Манай хүүгээс гадна хэд хэдэн хүүхдийг зодсон тохиолдол гарч, хохирогч хүүхдүүдийн эцэг, эхчүүд нэгдээд цагдаагийн байгуулагад хандсан. Одоо Баянгол дүүргийн цагдаагийн хэлтэс дээр хэрэг шалгагдаад явж байгаа" гэж байсан билээ.