-Он гарсаар 848 бог мал хорогдож, хоёр гэр нурж, 45 байшин, 233 гэр, 75 автомашин усанд автсан-

    Он гарснаар хэчнээн иргэн гол усанд амиа алдаж, хэдий хэмжээний хохирол учирсан талаар Онцгой байдлын газрын Гамшгаас урьдчилан сэргийлэх газрын мэргэжилтэн Б.Цэндээс тодрууллаа.

-Он гарснаас хойш хэчнээн иргэн үер, усанд амиа алдсан бэ?

         -Улсын хэмжээнд он гарсаар өнөөдрийн байдлаар 69 удаагийн усны ослын дуудлага бүртгэгдэж, 81 хүн амиа алдсан байна. Үүний 63 нь том хүн, 18 нь хүүхэд байгаа юм.

-Үер усны аюулаас хэчнээн мал, айл өрх үерт автаж, хохирсон бэ?

       -Үерийн усанд автсан, боогдсон дуудлага нийслэлийн хоёр дүүрэг, 21 аймгийн 46 суманд бүртгэгдсэн байна. Үүний хүрээнд 423 хүний амийг авран хамгаалсан. Харин зургаан иргэн амиа алдаж,  848 бог мал хорогдож, хоёр гэр нурж, 45 байшин, 233 гэр, 75 автомашин усанд автсаныг аюулгүй болгосон.

-Иргэд ихэвчлэн ямар шалтгаанаар усанд осолддог вэ?

        -Усны ослоор амь насаа алдаж байгаа гол шалтгаан нь иргэдийн анхаарал болгоомжгүй, хайхрамжгүй байдал, бага насны хүүхдээ хараа хяналтгүй орхих, согтууруулах ундаа хэрэглэсэн үедээ гол, ус руу орох, зориулалтын бус хөвөгч хэрэгсэлтэйгээр гол усанд орсноос үүдэлтэй байна.

-Иргэд болзошгүй үер, уснаас хэрхэн сэргийлэх ёстой вэ?

         -Цаг уурын байгууллага болон онцгой байдлын байгууллагаас гаргаж буй мэдээ, сэрэмжлүүлгийг анхаарч дагаж мөрдөх, бусдад дамжуулах, үерийн эрсдэл бүхий газар болон өндөр хүчдэл, цахилгааны шугамын ойролцоо бууж, суурьшихгүй байх хэрэгтэй. Мөн болзошгүй үерийн аюул, усны ослоос урьдчилан сэргийлэх, өөрийн болон ойр дотнын хүмүүсийнхээ аюулгүй байдлыг хангах ёстой. Ялангуяа бага насны хүүхдэд тавих хараа хяналтаа сайжруулж гол, мөрөн, нуур, цөөрмийн орчимд тоглуулахгүй байх ёстой.

     Стандартын бус завь, хөвөгч хэрэгслээр гол, нуурын усанд зугаалахгүй байх. Согтууруулах ундаа хэрэглэсэн үедээ гол, ус руу орохгүй байх, хамт олон найз нөхдөөрөө амарч, зугаалах үедээ бие биедээ хараа хяналт тавих хэрэгтэй. Харин тээврийн хэрэгслийн жолооч нар баталгаагүй зам, гарц, гарамгүй газраар гол гатлахгүй байх, тээврийн хэрэгслийн найдвартай байдлыг хангаж зорчихыг анхааруулж байна.