Өмнөговь аймгийн Баяндалай суманд 18 настай, эмэгтэй Н, 11 настай, эмэгтэй А нар малд яваад сураггүй болж, эрлийн баг 24 цагийн дараа иргэдийг эсэн мэнд олсон. Хүүхдүүдийн биеийн байдал болон сэтгэл зүй ямар байгаа талаар тэдний ээж Цэцэгсүрэнгээс тодрууллаа.

      Тэрбээр “Манайх Өмнөговь аймгийн Сэврэй сумын айл. Баяндалай сумын нутгаар оторлоод удаагүй байгаа. Ойрын үед бороо их орсон. Энэ сарын 25-нд би сумын төв яваад эзгүй байсан юм. Тэр хойгуур бороо орж, манан татаад малдаа явсан хоёр охин минь танил, дасал болоогүй нутагт байсан болохоор төөрчихсөн байна лээ. Би хүүхдүүддээ эсэн мэнд олсондоо маш их баяртай байгаа. Сум, орон нутгийн эрлийн багийнхандаа баярлалаа гэж хэлмээр байна. Охид минь нимгэн хувцастай гэрээс гарсан болохоор их даарсан байна лээ. Даарснаасаа болоод хонио орхилгүй туугаад л явсан байсан. Тэд маань шөнөжин уйлсан юм шиг байна лээ. Надад тэгж ярьсан. Одоо тэдний минь биеийн байдал болон сэтгэл санаа тайван байгаа” гэлээ.