Дорнод аймгийн Хэрлэн сумын гуравдугаар багийн Чулуут гэх газар “Петровис” компанийн шатахуун түгээх станцын ойролцоо 50 тонн шатахуун хадгалах савнаас хүний цогцос олдсон. Энэ тухай мэдээлэл тус аймгийн Онцгой байдлын газарт энэ сарын 21-нд бүртгэгдсэн бөгөөд, цогцсыг гаргаж Цагдаагийн газрын Мөрдөн байцаах тасгийн даргад шилжүүлэн өгсөн.

    Уг хэргийн шалгалтын ажиллагаа хэрхэн үргэлжилж байгаа, талийгаачийн нэр, нас, хүйсийг тодорхойлсон эсэхийг Цагдаагийн ерөнхий газрын Хэвлэл мэдээллийн төвийн ахлах мэргэжилтэн, Цагдаагийн ахмад Б.Билгүүнээс тодрууллаа.

      Тэрбээр “Шалгалтын ажиллагаа хуулийн дагуу үргэлжилж байна. Урьдчилсан байдлаар цагдаагийн газраас цогцсыг хэн болохыг нь тогтоосон. Түүнийг баталгаажуулахын тулд цогцсоос ДНХ, РНХ-ийн шинжилгээ авч, гарын дардсыг Шүүхийн шинжилгээний хүрээнд хүргүүлсэн байгаа. Шинжилгээний хариу 14-21 хоногийн дараа гарна” гэв.