Ховд аймгийн Алтай, Цэцэг суманд өчигдөр усархаг, аадар бороо оржээ. Үүний улмаас тус сумдын айл өрх, хүнсний дэлгүүр усанд автсан гэх мэдээлэл бий. Энэ талаар Цэцэг сумын Засаг дарга Ж.Мөнхзоригоос тодрууллаа.

     Тэрбээр “Манай суманд өчигдөр гэнэтийн аадар бороо 10-20 минутын турш орж, үер буусан. Үүний улмаас сумын төвийн 300-аад айл, 10-аад хүнсний дэлгүүр усанд автсан.  Хохирлын хэмжээг эцсийн байдлаар тогтоогоогүй байна. Хоёр хүнсний дэлгүүрийн бараа норсон гэх мэдээлэл бий. Одоогоор 3-4 айлыг үерийн уснаас гаргаагүй боловч, доторх эд хогшилыг авсан. Учир нь, үерийн ус татарсны дараа гэрийг зөөж гаргах боломжтой юм. Сум, орон нутгийн 20 гаруй ажилчид гамшгийн үед ажиллаж байгаа. Харин малчдаас үерт автсан талаарх дуудлага, мэдээлэл ирээгүй” гэлээ.