Хятадын Чиндао хотод “IJF”-ийн цуврал  жүдо бөхийн “Чиндао-2025 Гран при” тэмцээн есдүгээр сарын 26-28-ны өдрүүдэд болж өндөрлөв. Тэмцээний сүүлийн буюу гурав дахь өдөр ОУХМ Б.Гончигсүрэн эхний тойрогт гоц мөргөн, хоёрдугаар тойрогт Бахрейны Хаант Улсын нэр дээр барилдаж буй ОХУ-ын  тамирчин Чотчаевыг үндсэн цагт ялсан.

      Зооны аваргын төлөөх барилдаанд  Өмнөд Солонгос Улсын тамирчин, “Парисын Гранд слам”-ын мөнгөн медальт, Ази тивийн аварга LEE Seungyeob-ыг үндсэн цагт цэвэр ялсанаар аваргын алтан медалийн төлөө барилдахаар шалгарч үлдсэн юм. Алтан медалийн төлөөх барилдаанд Словакийн Marius FIZEL-ийг цэвэр ялж, “Чиндао-2025 Гран при”-гийн аварга боллоо.Ийнхүү Монгол Улсын баг, тамирчид  багийн дүнгээр хоёр алт, нэг мөнгө, гурван хүрэл, нийт зургаан медальтайгаар Япон Улсын дараа 2-р байрт жагсав.