Хятадын Чиндао хотод  жүдо бөхийн “IJF”-ийн цуврал “Чиндао-2025 Гран при” тэмцээний хоёр дахь өдрийн тэмцээн эхлэх гэж байна.  Хэдхэн мөчинй дараа эрэгтэйчүүдийн 73, 81 кг, эмэгтэйчүүдийн 63, 70 кг-ын жингийн урьдчилсан шатны барилдаанууд явагдаж, 17:00 цагаас финалын барилдаан болно.

ЭРЭГТЭЙЧҮҮДИЙН 73 КГ-ЫН ЖИНД:

     Эрэгтэйчүүдийн 73 кг-ын жинд 25 тамирчин байна. Манай улсаас Д.Будсүрэн “А” хэсгийн нэгдүгээр тойрогт Казахстаны Kuan  BARYS-тай таарсан. Түүнийг ялах юм бол хоёрдугаар тойрогт Унгар, Өмнөд Солонгосын бөхчүүдийн хэн ялсантай барилдана. Энэ жинд Л.Энхдөл “С” хэсгийн нэгдүгээр тойрогт Туркийн  Ejder TOKTAY-тай өрсөлдөнө. Хэрэв түүнийг буулган авч чадвал хоёрдугаар тойрогт Тажикстаны Abubakr SHEROV-той барилдана.

ЭРЭГТЭЙЧҮҮДИЙН 81 КГ-ЫН ЖИНД:

      Эрэгтэйчүүдийн 81 кг-ын жинд 17 тамирчин байна. Манай улсаас О.Шинэбаяр “D” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Өмнөд Солонгосын LEE Junseong-той таарсан. Түүнийг ялж чадах юм бол “D” хэсгийн аваргын төлөө барилдах боломж гарна.

ЭМЭГТЭЙЧҮҮДИЙН 63 КГ-ЫН ЖИНД:

     Эмэгтэйчүүдийн 63 кг-ын жинд 15 тамирчин байна. Манай улсаас МУГТ Л.Энхрийлэн “D” хэсгийн нэгдүгээр тойрогт Өмнөд Солонгосын SHIN Chaewon-той барилдана. Хэрэв түүнийг ялж чадах юм бол “D” хэсгийн аваргын төлөөх барилдааныг Словенийн Kaja KAJZER, Хятадын Lingling LIN нарын хэн ялсантай хийнэ. Харин эмэгтэйчүүдийн 70 кг-ын жинд манай улсаас бөх барилдахгүй.