-Ус миний дотны хүн гэсэн үг-

           “Токио-2020” олимпын усан спортын уралдаан долдугаар сарын 30-нд эхэлнэ. Манай улсаас Олон улсын хэмжээний мастер, усан спортын тамирчин М.Дэлгэрхүү, Олон улсын хэмжээний мастер, усан спортын тамирчин Б.Энххүслэн нар оролцох юм. Тэмцээн эхлэхэд нэг сарын хугацаа үлдсэн учир тэд өөрсдийгөө улам дайчилж, гаргасан амжилтаа ахиулахын тулд хичээж байна. Гэвч цар тахлын улмаас УОК-оос арга хэмжээ авч, усан бассейныг тодорхой хугацаанд хаасан учир тэд бэлтгэл хийх боломжгүй болсон. Тиймээс Олон улсын хэмжээний мастер, усан спортын тамирчин М.Дэлгэрхүү хугацаа алдаж, бэлтгэлээ таслахгүйн тулд хоёр удаа Туул голд сэлсэн юм. Харин өнөөдрөөс УОК-ын тусгай зөвшөөрөлтэйгөөр “Орчлон” сургуулийн усан бассейнд бэлтгэлээ хийж эхлэх юм. Тамирчидтай бэлтгэлээ хэрхэн хийж байгаа болон өмнө нь ямар амжилт гаргаж байсан талаар цөөн хором ярилцлаа.

-Хэдэн настайдаа усан спортоор хичээллэж эхэлсэн бэ. Түүнээс хойш гаргасан амжилтынхаа талаар ярьж өгвөл?

       -М.Д: Би тус спортоор 13 настайгаасаа хойш 12 жил тасралтгүй хичээллэж байна. Анх Орхон аймгийн “Хангарьд” клубт хичээллэж эхэлсэн. Энэ спортоор хичээллэхэд ээж минь намайг маш сайн ойлгож, дэмждэг. Би багаасаа гадаа тоглохоосоо илүү бассейнд тоглодог байсан. 14 настайгаасаа хойш маш олон удаагийн улсын аварга болж байлаа. Мөн олон улсын тэмцээнд оролцож, шинэчилсэн рекордуудынхаа давтамжаар Монгол Улсын рекордыг 10 гаруй удаа ахиулсан.

      Б.Э: Би 10 настайдаа мэргэжлийн тамирчны клубт орж байсан. Ес дэх жилдээ усан спортоор хичээллэж байгаа. Аав минь намай анх усан бассейнд явуулж, дэмждэг байсан. Би Монгол Улсын усан спортын эмэгтэй тамирчдаас анх олон улсын хэмжээний мастер болсон. Надаас өөр эмэгтэй усан спортын олон улсын хэмжээний мастер байхгүй байна.  13 настайгаасаа хойш даван удаа дэлхийн аварга шалгаруулах тэмцээнд оролцсон. Тэмцээнд оролцох бүртээ амжилтаа ахиулж яваа. 2018 онд Азийн залуучуудын аварга шалгаруулах тэмцээнээс мөнгөн медаль хүртэж байсан. Сарын дараа хүсэн хүлээсэн олимпын тэмцээнд оролцох гэж байгаад маш их баяртай байна.

-Таны амжилт гаргахад юу хамгийн их нөлөөлдөг вэ?

      -М.Д: Миний амжилт үе үеийн дасгалжуулагч нартай салшгүй холбоотой. Би шилжилтийн насандаа гурван жил зуны амралтаараа Сингапурт очиж бэлтгэл хийж байсан. Тухайн үед техник болон бэлтгэлээ зөв хийж сурсан, сайжирсан гэж боддог. Тэгэхээр миний амжилтын үндэс үүнээс эхлэлтэй гэж ойлгож болно.

    Б.Э: Би бэлтгэлийнхээ хоёр цагийг өөртөө зориулахыг хичээдэг. Гэр бүлийнхэн, багш нар намайг маш ихээр дэмждэг учраас тэдний хөдөлмөрийг дэмий үрж чаддаггүй. Би бэлтгэлээ өөртөө зориулж чадах юм бол хүссэн бүх амжилтад хүрнэ гэж боддог доо.

-Усан спортоор хичээллэж эхэлснээс хойш шантарч байв уу?

     -М.Д: Шантрах, гутрах, хожигдох, хожих, заримдаа болимоор санагдах олон. Энэ бүх үед урам авч босож ирэх гол хүч нь ээж минь байсан.  Би тамирчин болсноос хойш  олимпод орж үзэх мөрөөдөлтэй болсон. Энэ спортоор 12 жил хичээллэж хүч хөдөлмөр, өөрт байгаа бүхнээ зарцууллаа. Одоо надад мөрөөдөлдөө хүрэхэд ганцхан сарын хугацаа үлдсэн. Тийм учраас өөрийгөө илүү дайчилж бассейн хаалттай гээд зүгээр суухыг хүсээгүй.  Өөрт байгаа бүх боломжоо алдах гээд байгаа юм шиг мэдрэмж төрсөн учраа цаг алдахгүйн тулд эрүүл мэндээрээ дэнчин тавьж Туул голд хоёр удаа бэлтгэл хийсэн. Тамирчин болгон амжилтын төлөө өөрсдийнхөө төлөө зүтгэдэг шүү дээ. Би тэдний нэгэн адил. Тус спортоор хичээллэхэд хэн нэгэн надаас амжилт хүлээх итгэх итгэл маш үнэ цэнтэй бас хэцүү байдаг.

       Б.Э: Би маш зарчимч. Шантрах үе байсан ч гэлээ би маш хурдан сэргэж чаддаг, дайчин. Энэ нь миний бусад тамирчдаас ялгарах онцлог байх. Би усанд ороод тайвширдаг, өөрийгөө мэдэрдэг. Ус миний дотнын хүн гэсэн үг.

-Сарын дараа “Токио-2020” олимпын усан спортын тэмцээн эхэлнэ. Тус тэмцээнд оролцохдоо өөртөө ямар зорилго тавьсан бэ?

     -М.Д: Би дотроо маш том зүйл хүсэж байгаа. Ямартай ч амжилтаа дахин шинэчилнэ гэдэгт бүрэн итгэлтэй байна. Одооноос сэтгэл зүй болон бэлтгэлдээ бүх анхаарлаа төвлөрүүлж, байгаа бүхнээ зориулж, эрч хүчтэйгээр олимпод оролцоно.

     Б.Э: Хөл хорио тогтоосноос хойш бэлтгэлээ хийж чадаагүй. 2019 оны дэлхийн аварга шалгаруулах тэмцээнээс хойш уралдаан, тэмцээнд оролцоогүй. Тийм болохоор өөрийгөө ямар түвшинд байгааг ч сайн мэдэхгүй байна. Гэхдээ олимпод оролцож өмнө гаргаж байсан ажилтаа ахиулна гэдэгт итгэлтэй байна. Намайг дэмждэг хүмүүс ч итгэлтэй байгаа.