Боловсролын сайд П.Наранбаяр мэдээлэл хийлээ. Тэрбээр "Монголын Боловсрол шинжлэх ухааны Үйлдвэрчний эвлэлийн хорооноос тавьж байгаа шаардлагыг нь та бүхэнд хэлье. Аравдугаар сарын 9-нд БШУ-ны Үйлдвэрчний эвлэлийн хорооноос бидэнд хандаад, "Багш нарын үндсэн цалинг 3.5 сая хүргэ" гэсэн шаардлагыг та нар биелүүлэхгүй байгаа учир аравдугаар сарын 15-наас ажил хаяна" гэсэн шаардлагыг тавьж, мэдэгдлээ ирүүлсэн. Аравдугаар сарын 8-нд Монгол Улсын Ерөнхий сайд, Сангийн сайдтай өнөөдөр суулт хийж байгаа багш нарын төлөөллийг уулзуулсан. Үүний үр дүнд Засгийн газрын зүгээс төсөв хэлэлцэж байгаа энэ үед цалин нэмэх дээр дэмжсэн. Бид төсөвт 100 тэрбум төгрөгийг суулгасан байсан. Үүн дээрээ нэмэх нь гэж байгаад Ерөнхий сайдын зүгээс он гараад нэгдүгээр сарын 1-нээс багш нарынхаа цалинг 1 сая 850 мянгаар тооцохоор болсон. Энэ бол одоо байгаагаас 25 хувиар нэмэгдэж байгаа юм. Долдугаар сараас эхлэн төсвийн орлого нэмэгдвэл 2.5 сая, цаашлаад 3.5 сая болгоё гээд гурван жилийн төлөвлөгөөтэй ажиллая гэх саналыг хэлсэн. Гэвч харамсалтай нь Үйлдвэрчний эвлэлийн зүгээс шууд 3.5 саяыг шаардаж, маргааш нь яаманд ажил хаях тухай мэдэгдэл ирүүлсэн нь туйлын харамсалтай үйл явдал гэж харж байна. Энэ бол Монгол Улсын өнөөдрийн нөхцөл байдлыг огт харгалзаагүй, харин нөхцөл байдлыг далимдуулж улс төр хийж байна гэж үзэхээс өөр аргагүй байна. Иймээс Үйлдвэрчний эвлэлийг энэхүү шаардлагаа дахин харж үзээч гэж хэлмээр байна. Цалин нэмэх тал дээр бид адилхан байр суурьтай байгаа. Бие биенээ дэмжээд явж болно. Хүн хэлээрээ, мал хөлөөрөө гэдэг: Ярилцаад, шийдвэрлээд явья гэсэн саналыг хэлсэн. Хоёрдугаарт, аравдугаар сарын 9-нд ажил хаялт зарласан явдал нь хууль зөрчиж байгаа юм" гэв.