Засгийн газрын хуралдаанаас гаргасан зарим шийдвэрийг танилцуулж байна. Энэ үеэр ЗГХЭГ-ын дарга С.Бямбацогт “Эрдэнэс тавантолгойтой холбоотой асуудлын талаар мэдээлэл өгнө. Нүүрсний хэрэгтэй холбоотой олон нууц гэрээ байдаг. Тэднийг төрийн нууцад авч байгаад хууль зөрчиж, хулгай хийдэг, дундаас нь ашиг сонирхлын зөрчил гаргадаг гэдгийг олон нийт ярьдаг. Энэ бүхнийг ил болгох шаардлагатай гэдгийг зарим улс төрчид тавьдаг. 2022 онд оффтейк гэрээтэй холбоотой 32 гэрээг ил болгож олон нийтэд зарласан. Тэгэхээр Эрдэнэс Тавантолгойтой холбоотой бүх гэрээг олон нийтэд ил болгох шийдвэрийг гаргасан. Хоёрдугаарт, Гашуунсухайт Ганц модны хил холболтын төмөр замын гэрээ, түүнтэй холбоотой нүүрс худалдах, олборлох гэрээг ил болго. Үүний цаана олон төрлийн хулгай байна гэх асуудал иргэдийн дунд үүссэн. Үүнтэй холбоотойгоор гэрээг ил болгох асуудлыг Монгол Улсын Засгийн газрын хуралдаанаар хэлэлцэж ил тод болгохоор болсон. Хятад, Монголын талаас харилцаж байсан албан тушаалтнуудын албан бичгийг ил болгох шийдвэр гаргасан” гэлээ.