УИХ-ын гишүүн А.Ариунзаяа цаг үеийн асуудлаар мэдээлэл өглөө.

      Тэрбээр "П.Сайнзориг гишүүний цуглуулж байгаа санал дээр би гарын үсэг зурсан. Би парламентын засаглал аюулд орох вий гэдгээс ихээхэн санаа зовж байгаа хүний хувьд, Засгийн газрын тэргүүний хувьд буруу үйл ажиллагаа явуулж, буруу үйлдэл гаргаж байна гэж үзэн гарын үсэг зурсан. Манай намын бага хурал дээр санал өгсөн гишүүдийн 56 хувь нь Д.Амарбаясгаланд биш, Г.Занданшатарт өгсөн байгаад, бага хурлаараа Г.Занданшатар дарга намын даргаар сонгогдсон бол яг ийм асуудал болох уу, үгүй юу гэдгийг харах ёстой. Бодоод үзэхээр ийм асуудал болохгүй гэдэг нь ойлгомжтой. Нэг ёсондоо намын даргын сунгаанд ялагдсан учраас ийм мэдэгдэл хийж, ийм үйлдлийг гаргаад байна гэсэн үг. Ийм мэдэгдэл хийж байгаа хүн цаашлаад гүйцэтгэх засаглалыг ямар хэлбэрээр, яаж авч явах вэ гэдэг нь үнэхээр том асуултын тэмдэг, эрсдэлтэй гэж үзэж байна. Тайзнаа жүжиг дуусахад найруулагчид гарч ирдэг шиг С.Баярцогт гишүүн өчигдөр гарч ирээд УИХ тарах юм бол аюул учирна гэхчлэн дотоод хүсэл бодлоо яриад байна шүү дээ. Парламент тарна гэж байхгүй ээ. УИХ-ын 126 гишүүн бол парламент засаглалын төлөө тууштай явна. Гагцхүү гүйцэтгэх засаглалыг улс төрийн зорилгоор ашиглаж, Үндсэн хуулийн зөрчил үүсэхүйц хэмжээний мэдэгдэл хийх нь буруу юм. Ер нь улс төрийн зодооноо төрийн тайзнаа авчирсан хүн бол Г.Занданшатар" гэв.