Улсын төсөв, валютын нөөцийн талаар Сангийн сайд Б.Жавхлан мэдээлэл өглөө.

    Тэрбээр "Монголын төрийн бүх санхүүжилт хэвийн явж байгаа. Энэ жилийн хувьд төсвийн хөрөнгө оруулалтын гүйцэтгэл 50 гаруй хувьтай байна. Гуравдугаар улирал олон жилийн дунджаар энэ орчимд байдаг. Мөн Монгол банкнаас болон Үндэсний статистикийн газраас сүүлийн үеийн тоог авлаа. Есдүгээр сарын 30-ны байдлаар Монгол Улсын валютын нөөц 5 тэрбум 874 сая төгрөг байна. Энэ бол дөрвөөс таван сарын импортын хэрэгцээг хангах үлдэгдэл юм. Олон улсын валютын сангаас жилдээ хоёр удаа улс орнуудад очиж ажилладаг. Энэ ч үүднээс Олон улсын валютын сангийн баг өнгөрсөн долоо хоногт ирээд явлаа. Энэ шалгалтаар ямар нэгэн эрсдэлтэй зүйл гарсан ч юм уу төлбөр тооцоо, өр зээлтэй холбоотой ямар нэгэн асуудал байхгүй гээд явсан. Ирэх долоо хоногт би Олон улсын валютын сангийн намрын хуралд явна. П.Сайнзориг гишүүнийг цуг яваасай гэж бодож байна. Монгол Улсыг олон улсад яаж харж байна вэ гэдгийг өөрөө харах хэрэгтэй.Төв банкны эрхлэх гол ажил нь валютын нөөц байдаг. Төв банкны нөөц бол Монгол Улсын валютын нөөц. Тэгэхээр арилжааны банкууд дээр байгаа валют ч орно. Бид төсвөө хэлэлцэж, аль зардлаа хасах вэ гэдгээ л ил тод ярих ёстой. Гэхдээ төсөвт өргөн баригдсан байгаа 17 их наядын суурь зардал бүгд хуультай, тогтоолтой зардлууд байдаг. Энэ бүхнийг эргэж харах ёстой" гэв.