Ерөнхий сайд Г.Занданшатар Үндсэн хуулиар олгосон бүрэн эрхийнхээ хүрээнд Хууль зүй, дотоод хэргийн сайдаар Б.Энхбаярыг томилох болсноо олон нийтэд мэдэгдсэн. Сайдад нэр дэвшигчийг Ерөнхийлөгчид танилцуулсан бөгөөд УИХ-д танилцуулах тов тогтоож өгөхийг УИХ-аас 2025 оны 10-р сарын 1-нд албан бичгээр хүссэн ч өнөөдрийг хүртэл хариу өгөөгүй байна. Гүйцэтгэх засаглалын тэргүүн танхимдаа хэнийг ажиллуулах, чөлөөлөх, огцруулах нь Үндсэн хуульд 2019 онд оруулсан өөрчлөлт буюу 39-ийн 4-т тов тодорхой зааж өгсөн байдаг. 

     УИХ-ын дэгийн тухай хуулийн 103 дугаар зүйлийн 1-д зааснаар тухайн асуудлыг чуулганы нэгдсэн хуралдаанаар хэлэлцэх товыг УИХ-ын дарга тогтоохоор заажээ. Мөн хуулийн 6.6-д хэлэлцэх асуудлын дарааллыг УИХ-ын даргын дэргэдэх Зөвлөлийн саналыг харгалзан УИХ-ын дарга батална гэж тов тодорхой зааж өгчээ. Эндээс харвал Хууль зүй, дотоод хэргийн сайдад нэр дэвшүүлсэн Б.Энхбаярын танилцуулга хийх товыг тогтоохгүй эс үйлдлээрээ гацааж байгаа нь УИХ-ын дарга Д.Амарбаясгалан болж таарлаа.

      Монгол Улсад Үндсэн хуулиас дээгүүр эрх мэдэл, ашиг сонирхол гэж байх ёсгүй. Хэрэв сайдын томилгоог ингэж илтэд гацааж, ашиг сонирхлын зөрчилтэй үйлдэл хийсээр байвал эцсийн мөчид Үндсэн хууль зөрчсөн ноцтой үйлдэл болж хувирна. Танхимынхаа сайдыг томилох Ерөнхий сайдын Үндсэн хуулиар олгосон бүрэн эрх рүү УИХ-ын удирдлага халдсан, зөрчсөн хэрэг болж буруутах нь дамжиггүй. Хувийн өчүүхэн эрх ашгаа Үндсэн хуулийн дээгүүр тавьж буй Д.Амарбаясгалангийн энэ үйлдэл төрийн ажлыг гацааж орхилоо.