Дэлхийн алдартай контент бүтээгч “Nas Daily”-гийн үүсгэн байгуулагч Нусейр Ясин Монголд ирээд байгаа. Тэрбээр Монгол Улсад дэлхийн контент бүтээгчдийн “Nas Summit” арга хэмжээг зохион байгуулах гэж байгаа бөгөөд уг арга хэмжээгээр дамжуулан Монголыг дэлхийд сурталчилна гэдгээ мэдэгдсэн. Тэгвэл Монголыг дэлхийд сурталчлах зорилго тээн ирсэн дэлхийн алдартай контент бүтээгч Нусейр Ясин гэж хэн болохыг танилцуулж байна.

-"NAS DAILY" БУЮУ НУСЕЙР ЯСИН ГЭЖ ХЭН БЭ-

Nas Daily гэх влог нэрээрээ олонд танигдсан цахим сүлжээнд 40 сая гаруй дагагчтай контент бүтээгч Нусейр Ясин 1992 оны хоёрдугаар сарын 9-нд Израилийн Арраба хотод төржээ. Түүний аав нь багш, ээж нь сэтгэлзүйч мэргэжилтэй бөгөөд багаасаа лалын шашинтай болж өссөн ч нас биед хүрээд Исламын шашин шүтэхээ больж, “Шашингүй хүн болсон” гэж нэгэн контентдоо дурдаж байв.

                  Нусейр Ясин 19 насандаа АНУ-ын Харвардын их сургуульд сансрын инженерийн мэргэжлээр сурах хүсэлт гаргаж, тэтгэлэг авч байжээ. Гэсэн ч сурч байх хугацаандаа мэргэжлээ сольж, 2014 онд Харвардын их сургуулийг эдийн засагч мэргэжлээр төгссөн бөгөөд мөн энэ хугацаандаа компьютерын ухааны бакалаврын зэрэг хамгаалсан байна. Харин мэргэжил дээшлүүлэхээр суралцаж байхдаа төлбөртэй бүртгэлийн үйлчилгээ, нийгмийн сүлжээний хайлтын системийг зохиож, үүсгэн байгуулсан гэнэ. Энэ туршлагаараа Нусейр 2014 оны есдүгээр сараас эхлэн дэлхийн алдартай “Paypal” компанийн Нью-Йорк дахь салбарын гар утасны үйлчилгээ, “Venmo”-гийн программ хангамж хөгжүүлэгчээр ажиллаж байсан юм байна.

Харин 2016 онд “Venmo”-гоос бүрмөсөн гарч, дэлхийгээр аялж, судлахаар шийдэхдээ нэгэн цахим хуудас нээсэн нь өнөөгийн олон сая хүний мэдэх “Nas Daily” цахим хаяг. Араб хэлээр Nas гэдэг нь хүмүүс гэсэн үг бөгөөд Нусейр Ясины цахим хуудас “Хүмүүсийн өдөр тутам” гэх утгатай аж. 2018 оноос Нусейр Ясин цахим хуудастаа нэг минутын урттай сонирхолтой видео, контент оруулж эхэлсэн нь хүмүүсийн анхаарлыг татаж, 2018 оны есдүгээр сард найман сая, мөн тус оны арваннэгдүгээр сар гэхэд 10 сая гаруй дагагчтай болж байжээ. Өдгөө “Nas Daily” цахим хуудас 20 гаруй сая дагагчтай.

                  Нусейр Ясин зөвхөн видео контентоос гадна бичгийн салбарт ч хүч үзжээ. Тэрбээр 2019 онд “HarperCollins”-той хамтарч “60 секундэд дэлхий дахинаар” гэх нэртэй ном бүтээж, уншигчдын хүртээл болгосон бөгөөд энэ хугацаанд “Nas Daily” цахим хуудас, баг, салбараа тэлж, компани, академитай болжээ. Ташрамд дурдахад, “Nas Daily” цахим хуудаст өдөр бүр ордог нэг минутын контент тасралтгүй 1000 гаруй хоног үргэлжилж байгаа юм.