Олон жил дуншсан шинэ нисэх онгоцны буудал Хөшигийн хөндий долдугаар сард “хөшгөө” нээнэ

2021-06-03, 2168

Хоёр жил шахам хаалттай байсан хилээ нээнэ гэсэн шийдвэрийг Засгийн газраас гаргаснаар хилээ нээсэн 10 улсаас иргэд чөлөөтэй зорчих боломжтой болох нь. Хил нээхтэй зэрэгцээд Хөшигийн хөндийн шинэ нисэх онгоцны буудал нээлтээ хийнэ гэх таатай мэдээ бий.

Угтаа бол 2013 оноос шавыг нь тавьж өнөөдрийг хүртэл арав шахам жил “Шинэ онгоцны буудалтай болно” гэж ярьсан яриа ирэх долдугаар сарын 4-нд биеллээ олох нь. Энэ талаар Зам тээвэр, хөгжлийн сайд Л.Халтар “Хөшигийн хөндийн шинэ нисэх онгоцны буудлыг ирэх долдугаар сарын 4-нд ашиглалтад оруулахаар төлөвлөж, бэлтгэл ажлыг хангаж байгаа. Онгоцны буудлыг ашиглалт оруулах бэлтгэл ажлыг Иргэний нисэхийн ерөнхий газар хариуцаж байгаа” гэх мэдээлэл өгсөн.

Улаанбаатар хотын Олон улсын шинэ нисэх онгоцны буудал нь нийслэлээс ойролцоогоор 50 км, Төв аймгийн Зуунмод хотоос 10 орчим км зайд Төв аймгийн Сэргэлэн сумын нутаг дэвсгэрт Хөшигийн хөндий гэдэг газарт байгуулсан билээ.

Тус онгоцны буудал нь агаарын хөлгийн хоёр талын буулт хийх боломжийг бүрдүүлсэн, нислэгийн хөдөлгөөний удирдлагын шаардлагатай тоног төхөөрөмжөөр тоноглон, олон улсын зохих стандарт, шаардлагуудыг бүрэн хангах бүтээн байгуулалт болно гэдгийг анх шавыг нь тавихдаа л онцолж байлаа.

Шинэ нисэх буудал нийт 32 объектоос бүрдэх бөгөөд хамгийн том нь 53 мянган ам.метр хэмжээтэй терминал юм. Нислэгийн цамхгийг есөн баллын газар хөдлөлтөд тэсвэртэй байхаар барьжээ. 800 метр кубын багтаамжтай цэвэр усны байгууламж, 42 мегаваттын хүчин чадалтай дулааны станц, 825 машины зогсоол, 200 машины дулаан зогсоол зэргийг бариад буй. Мөн нисэх буудлын зурвасыг бетоноор барьсан бөгөөд манай улсын хамгийн том бетонон байгууламжид тооцогдож байгаа гэдэг. Нисэх буудал онцгой объект тул бүх барилга нэмэлт генератортай юм байна. Мөн 1.5 км урт хонгилыг газар доогуур барьжээ. Цахилгаан холбоо, цэвэр бохир усны гэсэн хоёр салаатай хонгил нь манай улсын анхны газар доорх байгууламж аж.

Улмаар Монголд анх удаа шинэ нисэх онгоцны буудалтай нийслэлийн холбосон дэлхийн жишигт нийцэхүйц хурдны замыг байгуулсан. Харамсалтай нь, ашиглалтад ороод, авто машин зорчиж амжаагүй шахам хурдны зам хагарч, олны хэл аманд өртөөд байгаа юм.

Энэ талаар Зам тээврийн хөгжлийн яамны Авто замын бодлогын зохицуулалтын газрын дарга Д.Загдраднаа "Барилгын ажил 2019 оны есдүгээр сард дууссан. Тус замын хагарал өнгөрсөн жилээс эхлэн хагарч эхэлсэн. Өнгөрсөн жил нарийхан хагарал байхад нь гагнаас хийсэн байсан ч энэ жил нэмж хагарсан байна. Эвдрэлийн шалтгааныг тогтоохоор Зам тээврийн, хөгжлийн яам гүйцэтгэгч болон төслийн зөвлөгч компанитай хамтран ажлын хэсэг ажиллаж байна. Одоогийн байдлаар зам хагарсан шалтгаан нөхцөл тогтоогдоогүй байна. Хагарлыг хэрхэн засах талаар гүйцэтгэгч компани аргачлал төлөвлөгөөгөө гаргаад ажиллаж байна. Улсаас ямар нэг мөнгө гарахгүй гүйцэтгэгч компани өөрийн хөрөнгөөр 100 хувь хийнэ. Гүйцэтгэгч компанийн баталгаат засварын хугацаа гурван жил буюу 2022 оны есдүгээр сард дуусна. Замд эвдрэл гарсан нь гүйцэтгэгч компанийн 100 хувь буруу гэж үзэж байгаа” гэх тайлбар өгөөд байгаа юм.

Хөшигийн хөндийн шинэ нисэх онгоцны буудлыг ашиглалтад оруулах бэлтгэл ажлын талаар ИНЕГ-ын холбогдох мэргэжилтэн “Долдугаар сарын эхээр нисэх онгоцны буудлыг ашиглалтад оруулахаар бид бэлтгэлээ хангаж байна. Долдугаар сарын нислэгийн хуваарь гараагүй учраас хаашаа нислэг үйлдэх нь тодорхойгүй байгаа юм. Шинэ нисэх буудал нь Япон-Монголын хамтарсан компанийн мэдэлд очсон байгаа. Хоёр улсын Засгийн гэрээний дагуу шинэ нисэх онгоцны буудлыг ашиглалтад оруулахад Иргэний нисэхийн ерөнхий газраас хүний нөөцөөр хангах, нислэгийн удирдлагын үйл ажиллагааг хангах үүрэг хүлээж байна” гэх тайлбарыг өгөөд буй.

Ийн арав орчим жил үргэлжилсэн шинэ нисэх онгоцны буудал хөшгөө нээхэд бэлэн болжээ.

Олон жил дуншсан шинэ нисэх онгоцны буудал Хөшигийн хөндий долдугаар сард “хөшгөө” нээнэ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид