ҮНДСЭН ХУУЛИЙН ЦЭЦ ЕРӨНХИЙЛӨГЧИЙН СОНГУУЛИЙН ХУВЬ ЗАЯАГ ШИЙДЭЖ, ЦЭЦИЙН ДЭЭР МАН БАЙДАГ УУ, ХӨХ ТЭНГЭР БАЙГАА ЮУ ГЭДГЭЭ ХАРУУЛАХ ЦАГ ИРЛЭЭ

          У.Хүрэлсүх Х.Баттулгыг Ерөнхийлөгчийн сонгуульд нэр дэвшүүлэхгүй гэж мөн ч их улайрч байна. Зөвхөн У.Хүрэлсүх гэлтгүй МАН-ынхан Х.Баттулгаас сүнсээ зайлтал айж байгаа бололтой. Тэд “Х.Баттулгыг “дараад” авчихвал түүнээс өөр олигтой нэр хүндтэй хүн Ардчилсан намд ч байхгүй. Тэгээд ч 100 жилийнхээ ойгоор МАН-аас Ерөнхийлөгчтэй болох хэрэгтэй. Ерөнхийлөгч болох хүн нь У.Хүрэлсүх” гэсэн тооцоолбор хийчихсэн суугаа гэх. Энэ ч үүднээс Ерөнхийлөгч Х.Баттулгын эсрэг хар пиарыг бялууртал нь хийж  байгаа. Хэдэн албат нь Х.Баттулгад улс төрд өөд нь гаргахгүй болгох үхлийн цохилт хийх гэж үйлээ үзэж, үстэй толгойгоо зулгааж, өдрийн бодол шөнийн зүүд болцгоож байна. Өөрөөр хэлбэл, түүнийг МАН-ынхан буланд шахчихаад баруун солгойгүй бөөнөөрөө “балбаж”  байгаа. Одоо бүр Үндсэн хуулийн цэцийн гишүүдтэй нийлчихжээ. Энэ талаарх баримтыг уншигч та бүхэнд ямар нэгэн нэмэр хачиргүйгээр хүргэж байна.

ҮНДСЭН ХУУЛИЙН ДЭЭР МАН БАЙДАГ УУ

         Х.Баттулга Ерөнхийлөгчийн сонгуульд нэр дэвшиж болно, болохгүй гээд л хэдэн талаас хэрэлдэх болсон. Нэг хэсэг хуульчид “Хэзээ байтлаа шинээр батлагдсан хуулийг эргүүлэн ашиглаж байлаа. Шинээр мөрдөгдөж байгаа хуулийг эргүүлэн ашиглаж ирсэн түүх Монголд байхгүй. 2021 онд Ерөнхийлөгч болсон хүн л дахиж сонгуульд өрсөлдөх боломжгүй болж байгаа. Түүнээс Х.Баттулга Ерөнхийлөгчийн сонгуульд нэр дэвшиж болно” гээд тайлбарлаж ярих. Харин нөгөө бүлэг хуульчид нь “Х.Баттулгад нэр дэвших эрх байхгүй. Хуулиараа хориг тавьчихсан. Та нар хуулиа унш” гээд л пээдэлзэх. Арга нь  барагдаад Үндсэн хуулийн цэц энэ асуудлыг шийдэж, нэг тийш нь болгох дээрээ тулсан. Өөрөөр хэлбэл, Үндсэн хуулийн цэц Ерөнхийлөгчийн сонгуулийн хувь засаг шийдэж,  цэцийн дээр МАН байдаг уу, эсвэл хөх тэнгэр байгаа юу гэдгээ олон нийтэд үнэн зөвөөр харуулах шийдвэрийн өмнө тулж ирээд байна.

        Өнгөрсөн долоо хоногийн баасан гарагт Х.Баттулгыг дахин нэр дэвшиж болох, үгүйг Үндсэн хуулийн цэцийн дунд шатны  хуралдаанаар хэлэлцсэн юм. Өглөөнөөс эхэлсэн хурал орой болтол үргэлжлээд ямар нэгэн шийдэлд хүрч чадсангүй. Учир нь, Үндсэн хуулийн цэцийн гишүүд хоёр хуваагдчихсан байна. Нам бус, өмнө нь Ардчилсан намд ажиллаж байсан цэцийн гишүүд “Тодорхой асуудал байна. Х.Баттулга нэр дэвшиж болно” гэсэн шийдвэр хэлж. Харин МАН-аас угшилтай цэцийн гишүүд Х.Баттулгыг нэр дэвшүүлэхгүй гээд л зүтгээд байгаа бололтой юм. Ийм маягаар хэрэлдэж, хэлэлцсээр ажил тарах цаг болж, ирэх даваа гарагт асуудлыг эцэслэнэ хэмээгээд тарцгаасан гэнэ.

МАН-ЫН УГШИЛТАЙ ЗУРГААН ГИШҮҮН ҮХЦ-Д АЖИЛЛАЖ БАЙНА

Ингээд уншигч та бүхэнд МАН-аас угшилтай Үндсэн хуулийн цэцийн зургаан гишүүнийг танилцуулж байна.

        Үндсэн хуулийн цэцийн дарга Н.Чинбат насаараа МАН-д зүтгэж яваа нэгэн. ХЗДХЯам  агентагийн дарга байсан юм. Бүр тодруулж хэлбэл, Оюуны өмчийн газрын даргаар ажиллаж байгаад Үндсэн хуулийн дарга болон дэвшиж очсон билээ. Дараагийн хүн нь Үндсэн хуулийн цэцийн даргаар ажиллаж байгаад Солонгосын онгоцны үйлчлүүлэгч эмэгтэйн өгзөгийг базсан. Солонгост шоронд орчих шахаж явсан “өгзөг Одбаяр” хочтой МАН-ын гишүүн, Хууль зүйн сайд асан Д.Одбаяр юм. Засгийн газрын хэрэг эрхлэх газрын дарга асан Ш.Солонго мөн л Үндсэн хуулийн цэцийн гишүүн. МАН түүнд олон албан тушаал өгч байсан. Тэр намдаа өртэй нэгэн гээд хэлчихэж буруудаад байх юмгүй.  Г.Баясгалан нь  мөн л МАН-ын угшилтай нэгэн. Хууль зүй дотоод хэргийн яамны Төрийн нарийн бичгийн даргаар ажиллаж байсан нэгэн. Шүүхийн шийдвэр гүйцэтгэх ерөнхий газрын даргаар ажиллаж байсан Г.Туулхүү мөн л МАН-ынх. Түүнийг Д.Одбаярын хүн гэдэг. Мөн Б.Буяндэлгэр үндсэн хуулийн цэцийн гишүүн бий. МАН-ын Ардын их  хурлын депутат байсан.  

           Тэд намынхаа даалгаварыг биелүүлж хууль зөрчих үү. Эсвэл хуулийн дагуу шийдвэр гаргах уу гэдгийг харах л үлдлээ. Зарим эх сурвалжийн хэлж буйгаар МАН-ынхан цэцийн гишүүдэд нөлөөлж байгаа гэх мэдээлэл байгаа юм.  Өөрөөр хэлбэл, МАН-аас “Х.Баттулгын талд шийдвэр гаргаж яавч болохгүй. Ерөнхийлөгчийн сонгуульд нэр дэвшиж болохгүй гэсэн дүгнэлт гарга. Албан тушаал, ажил, амьдрал, цаашдын карьертай чинь ярина шүү” хэмээн үүрэгдсэн тухай яриа ч хаа сайгүй гарчээ. Асуудал ийм дээрээ тулж, Үндсэн хуулийн цэцийн зургаан гишүүн “Хууль зөрчсөн шийдвэр гаргаагүй гэж олон нийтэд яаж аятайхан ойлгуулах вэ” хэмээн толгойгоо гашилгаж суугаа аж. 

МАН-аас “Х.Баттулгын талд шийдвэр гаргаж яавч болохгүй. Ерөнхийлөгчийн сонгуульд нэр дэвшиж болохгүй гэсэн дүгнэлт гарга. Албан тушаал, ажил, амьдрал, цаашдын карьертай чинь ярина шүү” хэмээн үүрэгдсэн тухай яриа ч хаа сайгүй гарчээ.