Засгийн газрын өнөөдрийн хуралдаанаас гаргасан шийдвэрийг танилцууллаа. Энэ үеэр Хууль зүй, дотоод хэргийн сайд О.Алтангэрэл "Засгийн газрын өнөөдрийн хуралдаанаар Ашигт малтмалын тухай хуулийн наймдугаар зүйлийн 1.7 дахь хэсэг, Төрийн болон орон нутгийн өмчийн тухай хуулийн наймдугаар зүйлийн 1 дэх хэсгийг зөрчиж тодорхой ордын стратегийн ач холбогдол бүхий ашигт малтмалын ордод хамаарах УИХ-ын 2007 оны тогтоолыг биелүүлэлгүйгээр Монгол Улсын Засгийн газар, "Энержи ресурс" ХХК-ийн хооронд байгуулсан Ашигт малтмалын тусгай зөвшөөрөл шилжүүлэх тухай гэрээний холбогдох хэсгийг хуульд нийцүүлэх арга хэмжээ авахыг Монгол Улсын Засгийн газар, Ерөнхий сайд Л.Оюун-Эрдэнэд даалгах гэсэн утгатай тогтоолын төслийг УИХ-д өргөн мэдүүлэхээр шийдвэрлэлээ. Энэхүү тогтоолын төсөлд Өмнөговь аймгийн Цогтцэций сумын нутаг дэвсгэрт байрлах ухаа худаг ашигт малтмалын тусгай зөвшөөрөл эзэмшигч хуулийн этгээдтэй хэлэлцээ хийж, Ашигт малтмалын тухай хуулийн 8.1.7-д заасны дагуу УИХ-д өргөн мэдүүлэхийг Засгийн газарт мөн үүрэг болгосон ийм заалт бүхий тогтоолын төслийг УИХ-д өргөн мэдүүлж, шийдвэрлэлүүлэх нь зүйтэй гэж үзлээ. Тус тогтоолыг гаргах болсон хууль зүйн үндэслэл нь УИХ-аар хэлэлцэж шийдвэрлэх ёстой Монгол Улсын Засгийн газраас танилцуулах ёстой процесс зөрчигдсөн учраас стратегийн ач холбогдол бүхий ашигт малтмалын орд гэж УИХ-аас тогтоосон энэхүү ордыг хувийн хэвшлийн аж ахуй нэгжид эзэмшүүлсэн энэхүү үйл ажиллагааг хуульд нийцүүлсэн нь зүйтэй байна. Үүнийг шийдвэрлэх эрх хэмжээ нь гагцхүү УИХ-д байгаа учраас УИХ-аас тогтоол баталж, энэ дагуу олгогдсон эрх хэмжээний дагуу Засгийн газар тус аж ахуй нэгжтэй хэлэлцээ хийж, төрийн эзэмшлийн хувь хэмжээг тогтоох нь зүйтэй гэж үзсэн юм" гэв.