Саудын Арабын Хаант Улсын ханхүү, төрийн сайд Турки бин Мухаммад бин Фахд Аль-Сауд Ерөнхийлөгчийн Тамгын газрын дарга Я.Содбаатарын урилгаар Монгол Улсад энэ сарын 4-7-ны хооронд албан ёсны айлчлал хийж байна. Айлчлалын хүрээнд, ханхүү Турки бин бин Мухаммад бин Фахд Аль-Сауд Монгол Улсын Ерөнхийлөгч У.Хүрэлсүхэд бараалхаж, Гадаад харилцааны сайд Б.Батцэцэг, Байгаль орчин, аялал жуулчлалын сайд Б.Бат-Эрдэнэ, Ерөнхийлөгчийн Тамгын газрын дарга Я.Содбаатар зэрэг албаны хүнтэй уулзана. Талууд хоёр улсын цаашдын харилцаа, хамтын ажиллагааг хөгжүүлэг, байгаль орчин, уур амьсгалын өөрчлөлтийн чиглэлээ хамтран ажиллах зэрэг асуудлаар санал солилцох юм. Тэгвэл Саудын Арабын Хаант Улсын ханхүүгийн албан ёсны айлчлалтай холбоотойгоор ханхүү Турки бин Мухаммад бин Фахд Аль-Сауд гэж хэн болохыг уншигч танд танилцуулж байна.

-ТУРКИ БИН МУХАММАД БИН ФАХД АЛЬ-САУД ГЭЖ ХЭН БЭ-

Саудын Арабын ханхүү Турки 1979 оны аравдугаар сарын 7-нд тус улсын Эр-Рияд хотод төржээ. Тэрбээр Салман хааны ах Фахдын ач хүү бөгөөд аав нь Саудын Арабын зүүн мужийн захирагч Мохаммед бин Фахд. Ханхүү Турки бага насаа өвөө Фахд хаан, хунтайж Найеф бин Абдулизиз нарын хамт өнгөрөөсөн бөгөөд Саудын Арабын Арамко сургуульд бага, дунд боловсрол эзэмшжээ. Улмаар 2002 онд Файсал хааны нэрэмжит их сургуулийг хуулийн чиглэлээр дүүргэсэн байна.

               Өдгөө ханхүү Турки Саудын Арабын Засгийн газрын гишүүн, төрийн сайдаар ажиллаж бөгөөд үүнийхээз зэрэгцээ хунтайж Мохаммедийн нэрэмжит их сургуулийн Удирдах зөвлөлийн дэд дарга, Мохаммед бин Фахдын хүмүүнлэгийн хөгжлийн сангийн гүйцэтгэх хороог тэргүүлдэг аж.

                Мөн ханхүү Турки төрийн эрхийг барихаас гадна маш чадварлаг бизнесмен гэнэ. Тухайлбал, ханхүү Турки “TAALEM” нэртэй боловсролын үйлчилгээний компанийг удирдахын зэрэгцээ 1968 онд байгуулагдсан Даммам хотод төвтэй хийн хоолой болон түүнтэй холбогдох бүтээгдэхүүнийг үйлдвэрлэж, борлуулдаг  “Амиантит” компанийн дэд даргаар ажилладаг. Зөвхөн “Амиантит” компани нь гэхэд олон оронд хоолойн системийн үйлдвэрлэлийн 30 үйлдвэр, зургаан технологийн компани, дөрвөн материал нийлүүлэгч, ханган нийлүүлэлт, инженерийн найман охин компаниас бүрддэг том компани юм байна.

Саудын Арабын Засгийн газрын гишүүн, төрийн сайд Турки бин Мухаммад бин Фахд Аль-Сауд Монгол Улсад дөрөв хоногийн хугацаатай албан ёсны айлчлал хийнэ.