“Амьдралаа, амьдралаа би чамд хайртай” хэмээх дууг мэдэхгүй хүн үгүй биз ээ.

      Энэ дуу бол хүнийг амьдралд хайртай болгож, алдаа, оноо бүхнийг ухааруулсан уран бүтээл. Энэ удаагийн “дуу төрсөн түүх” буландаа яруу найрагч Дан. Нямаагийн шүлэг, Ё.Сүхбаатарын ая “Амьдралаа, би чамд хайртай” хэмээх монгол тулгатны 100 дуу нэгийг онцолсон юм.

       Д.Нацагдоржийн шагналт яруу найрагч Данзангийн Нямаа “Амьдралаа, би чамд хайртай” дууны үгийг 1980-аад оны сүүлчээр бичжээ.

Тэрбээр тус дууны шүлгийг бичсэн тухайгаа ярихдаа “Би энэ шүлгийг дуу болгох гэж зориулж бичээгүй. Гэхдээ олон жил миний сэтгэлд иймэрхүү шүлэг бичих санаа оршиж байсан. Би 1980-аад оны эхээр аавыгаа алдсан. Энэ дуу 1980-аад оны сүүлчээр гарсан. Энэ хугацаанд аавдаа зориулж шүлэг бичих юм сан гэж эрмэлздэг байлаа. Гэхдээ аавыгаа хөдөөлүүлчихээд буцаж явахдаа амьдралын тухай бодож, ихэд уй гашуутай байсан нь гарцаагүй шүү дээ. Тэр үед энэ дууны шүлгийн эхний бадаг “төрсөн” гэж боддог.

 Яагаад гэвэл тухайн үед “Аав минь бурхан болсон ч эх орон, газар дэлхийдээ шингэж үлдлээ. Би аавынхаа үргэлжлэл болж амьдарна даа” гэх бодол төрсөн. Энэ бодол тус дууг бүтэн болоход нөлөөлсөн ч байж болно шүү дээ. 20-аад жилийн өмнө манай доод ангийн М.Эрдэнэгомбо над дээр ирээд миний бичсэн шүлгийг үзэж сууснаа “Амьдралаа, би чамд хайртай” дууны шүлгийг олж, “Энэ шүлэгт ая хийнэ” гээд авч явсан. Түүнээс хойш хоёр жилийн дараа энэ шүлэг дуу болсон юм даа. Тухайн үед студи ховор байсан шүү” хэмээн дурсамжаа өгүүлсэн байдаг.

-Амьдралаа, би чамд хайртай дууг дуулснаас хойш Э.Бүрнээбаяр дуучинд 300-400 захидал иржээ-

          МУГЖ Э.Бүрнээбаярын уран бүтээлийн оргил болж, түүнийг олон түмэнд хамгийн их таниулж, МУГЖ хэмээх эрхэм алдар хүртэхэд нь хамгийн их нөлөөлсөн дуу бол “Амьдралаа, би чамд хайртай”  хэмээх дуу хэмээн ам бардам ярьдаг юм билээ. “Амьдралаа, би чамд хайртай” гэх  дуу гарсан цагаасаа хойш олон хүнд таалагдаж, хит болж, өнөөдрийг хүртэл нийтийн шилдэг дуунаас гараагүй үнэн.

      1980-аад оны сүүлч, 1990-ээд оны эхээр иргэд нийгэм, эдийн засгийн хямралтай нүүр тулж, сэтгэл зүй таагүй, гонсгор байх цаг үед олон түмэнд сэтгэлийн эрч хүч бэлэглэж, бусдыг “цэнэглэж” байсан дуу бол  яах аргагүй “Амьдралаа, би чамд хайртай” дуу байжээ.

     Э.Бүрнээбаяр дуучиныг дуулж, олны хүртээл болгосон цагаас хойш үзэгч, сонсогчдод маш их таалагдаж, энэ дууг сонсох дуртай, баярлаж, талархсан, сэтгэл нь хөөрсөн, аливааг ухаарсан янзтай 300-400 захидал хүлээн авсан гэдэг. Үүнтэй холбоотой нэгэн жишээг дурдахад “Энэ дуу жилийн өмнө гарсан бол, би энд суухгүй байсан даа” хэмээн нэгэн хоригдлоос дуучин Э.Бүрнээбаярт захидал ирж байсан удаадтай гэдэг. Энэ дууны талаар МУГЖ Э.Бүрнээбаяр ярихдаа “Амьдралаа, би чамд хайртай” хэмээх дуу олон хүнд амьдралд итгэх итгэл, мөн чанар, ухаарал хайрласан. Үнэн үгтэй дуу учраас хүнд амархан хүрсэн санагддаг. Миний уран бүтээлийн оргил нь” гэсэн байдаг.

   1992 онд Морин хуур наадамд “Амьдралаа, би чамд хайртай” дуугаар оролцож, үзэгчдийн тэргүүн шагнал хүртэж байв. Шагнал гардуулах мөчид хөгжмийн зохиолч, яруу найрагч, дуучин гурав тайзан дээр гарч ирээд баярлаж, бүжиглэсэн гэдэг. Тэгээд Э.Бүрнээбаяр дуучны хацар дээр хоёр талаас нь зэрэг үнсэхэд үзэгч олон инээж баясаад сүртэй байсан гэдэг. Гэтэл хөгжмийн зохиолч Ё.Сүхбаатар “Гурван жижигхэн хүн тайзан дээр гүйж,  дуучин Э.Бүрнээбаярын хоёр хацар дээр нь зэрэг үнслээ гэж шоолсон биз” гээд инээлдсэн гэдэг.

     Хүмүүс “Амьдралаа, би чамд хайртай” дууны тухай ярихдаа “Гурван жижигхэн хүний том дуу” гэж ярьдаг юм билээ. “Амьдралаа, би чамд хайртай” хэмээх дуу амьдралд хайртай, амьдрал үргэлжид мөнх байдаг тухай өгүүлжээ.