НИТХ дахь Ардчилсан намын бүлгийн хуралдаан болж нийслэлийн 2024 оны төсвийн тодотголыг хэлэлцлээ. Хуралдаанд Нийслэлийн засаг даргын нэгдүгээр орлогч П.Сайнзориг болон холбогдох газар, хэлтсийн дарга нар оролцож төсвийн тодотголтой холбогдуулан мэдээлэл өглөө.

        Энэ үеэр НИТХ-ын төлөөлөгч Т.Батцогт Улаанбаатар хотын төсөв иргэдийн өмнө тулгамдаж байгаа утаа, түгжрэл, эрчим хүч, дулааны хангамж болоод ая тухтай амьдрах орчныг бүрдүүлэхэд зарцуулагдаж чаддаггүй бөгөөд сонгуулийн жилтэй холбогдуулан төвсийн зарлагыг нэмэгдүүлж, алдагдлаа татвар, торгуулийн орлогоор бүрдүүлэх гэж байна хэмээн шүүмжилж, байр сууриа илэрхийллээ.

        Тодруулбал тэрбээр “Дулаарч байгаа учраас утаа багасчихаар утааны асуудлыг нийтээрээ мартаад түүнийг нь ч маш сайн мартуулж чаддаг. Утааны асуудлыг шийдэх суурийг нь 2012-2016 онд тавьсан байдаг. Сэлбэ дулааны эх үүсвэр, Баянхошуу, Амгалан дулааны станц гээд гурван эх үүсвэр байна. Яагаад үүнийг ашиглахгүй байгаа юм. Яг гэр хорооллыг тэг голд нь байгаа. Үүнийг ашиглахад яагаад төсөв мөнгө тавихгүй байгаа юм. Хэдий болтол өнөөдөр гэр хорооллын иргэд Улаанбаатар хотын байшин хорооллын дулааны мөнгийг төлөх ёстой юм. Улаанбаатар хотыг дулааныг хангаж байгаа цахилгаан станцуудын хүчин чадал хүрэхгүй байгаа учраас дулаан алдагдлыг эрчим хүчээр нөхөж хангаж байна. Тэр эрчим хүчний нөхөөсийг нь гэр хорооллын эрчим хүч хэрэглэж байгаа иргэд давхар төлөөд явж байгаа. Тэгвэл адилхан л дулааныг нь хэрэглэдэг болгомоор байна шүү дээ” хэмээв.

    Ташрамд сануулахад, Нийслэлийн 2024 оны төсвийг 399.6 тэрбум төгрөгөөр тодотгосноос 54.6 тэрбум төгрөгийг метроны зөвлөх үйлчилгээнд, 333 тэрбум төгрөгийг метро барих гүйцэтгэлийн санхүүжилтэд зарцуулахаар төлөвлөжээ.