“Бид монголчууд” малчдад туслах тусламжийн аян эхлүүлжээ. Уг тусламжийн аяны талаар зохион байгуулагчид мэдээлэл өглөө. Аянд МҮБХ, Монголын морин спорт, уяачдын холбоо, Монголын сайтуудын холбоо, “Малчин” ХХК, Гандантэгчилэн хийд болон бусад Үндэсний спортын хороонууд хамтарч ажиллаж байна.

        -Улсын харцага Г.Ганхуяг “Монгол Улсын нийт газар нутгаар сүүлийн 50 жилд ороогүй их цас ороод байна. Тэр тусмаа говийн аймгуудад их хэмжээний цас орсноос болоод Монгол гэр цасанд дарагдаж, яндан цухуйх байдалтай байгааг харлаа. Тиймээс Монголын уламжлалт нүүдлийн аж ахуй, соёлыг авархын тулд “Бид монголчууд” аяныг зохион байгуулж, бид нэгдэж байна. ОБЕГ-ын дэд дарга, бригадын генерал Б.Ууганбаяр, хурандаа н.Лхагвасүрэн нартай уулзахад тусламжийн аяныг нааштайгаар хүлээж авсан. Байгууллага, компаниудаас ирэх хандив, тусламжийг шилэн дансаар ил тодоор зарлана. “Бид монголчууд” нь хандивын аян биш тусламжийн аян гэдгийг сануулж хэлэх байна. ОБЕГ-ын албан тоот данс руу тусламж хандиваа төвлөрүүлнэ. Тиймээс Үндэсний бүтээгдэхүүн, өв соёлоо түгээн дэлгэрүүлдэг байгууллагуудыг нэгдэж, ард иргэд маань ч мөн  бидний санаачилгыг дэмжиж, малчин түмэндээ туслаасай гэж уриалж байна” гэв.

      -МҮБХ-ны тэргүүн Ц.Магалжав “Монголын үндэсний бөхийн холбоо нийгмийн хариуцлагын хүрээнд цас, зудтай байгаа малчиддаа туслах аянд нэгдэж ажиллаж байгаа. Гуравдугаар сарын 1-ий 15:00 цагаас Үндэсний бөхийн хандвийн барилдааныг зохион байгуулахаар болсон” гэлээ.

      -Монголын морин спорт, уяачдын дэд ерөнхийлөгч Ц.Гончигсүрэн “ ММСУХ-ны зүгээс хамтран ажиллаж, бусдыг уриалан тодорхой хэмжээний дэмжлэг туслалцаа үзүүлэх зорилгоор нэгдэж байна. Өнгөрсөн 2020 онд буюу цар тахалтай тэмцэх үед бид 120 сая төгрөг хандивлаж байсан. ММСУХ-д 110 мянга гаруй уяач бүртгэлтэй байдаг. Тийм учраас хандивт нэгдсэн улсын алдар цолтой уяач нар өөрсдийн хурдан хүлгүүдээс сонгон дуудлага худалдаа зохион байгуулна. Ийм ажлуудыг төлөвлөөд явж байна” гэсэн юм.

      -“Малчин” ХХК-ийн захирал Д.Чинзориг “Малчин компани 30 жил малчидтайгаа хамтран ажиллаж ирлээ. Олон тооны мал хоргодож, түүгээр ч барахгүй хүний амь эрсдэж, хохирол амссанд туйлын харамсаж байна. Хандивт “Малчин” компани нь гар чийдэн, цахилгаан хэрэгслүүдийг боломжоороо нийлүүлэн харилцаа холбоо, мэдээллээр хангаж, санхүү эдийн засгаар дэмжиж оролцоно” гэв.

Б.Хонгорзул