Бяцхан дуучин Б.Бат-Энэрэл хоёрдугаар сарын 17- нд “Талархал” бие даасан тоглолтоо хийсэн билээ. Тоглолтын үеэр түүнд Соёлын тэргүүний ажилтан гэх цол тэмдэг гардуулж өгсөн байдаг.

      Б.Бат-Энэрэлийн тоглолтын үеэр Монголын зохиолчдын эвлэлийн шагналт яруу найрагч В.Нэргүй шагналыг гардуулж өгсөн. Тэрбээр тоглолтын үеэр үг хэлэхдээ “Соёлын яамны Захиргаа, удирдлагын хэлтсийн дарга Ч.Энх-Амгалан гардуулж өгөх ёстой байсан ч ажил амжихгүй, ирж чадсангүй. Ч.Энх-Амгаланг төлөөлж би ирлээ. Б.Бат-Энэрэл дүүдээ баяр хүргэе, баяртай байна” гэсэн юм.

Тэгвэл Соёлын яамнаас Б.Бат-Энэрэлд шагнал олгоогүй гэдгийг  мэдээллээд байна.

Бид Соёлын яамны Захиргаа, удирдлагын хэлтсийн дарга Ч.Энх-Амгалангаас энэ талаар тодрууллаа.

-Соёлын яамнаас Б.Бат-Энэрэл хүүд СТА цол олгосон уу?

       -Яамнаас ямар нэгэн байдлаар цол, тэмдэг олгоогүй. Харин яруу найрагч В.Нэргүй тэргүүтэй хүмүүс өнгөрсөн баасан гарагт яаман дээр ирсэн байна лээ. Бид “Шагналд тодорхойлох бичиг баримтаа албан ёсоор өг” гэж хэлсэн. Холбогдох материалаа албан ёсоор өгөөд явсан байна лээ. Одоогоор Б.Бат-Энэрэлд СТА олгох албан ёсны шийдвэр гараагүй байна. Соёлын сайдын гарын үсэгтэй, тушаалаар олгодог шагнал шүү дээ.

-Яруу найрагч В.Нэргүй шагнал гардуулахдаа “Соёлын яамны Захиргаа удирдлагын хэлтсийн дарга Ч.Энх-Амгалан энэ цол, тэмдгийг олгох ёстой байсан” гэж хэлсэн. Энэ нь ямар учиртай юм бэ. Та СТА олгох тушаал гаргах эрхтэй юу?

         -Надад шагнал олгох, тушаал гаргах эрх байхгүй. В.Нэргүй тэргүүтнүүд хуурамч тэмдэг зүүж өгсөн байна лээ. Ингэхдээ миний нэр төрийг барьсан байсан. Мөн хуурамчаар миний нэрийг барьж цол олгосондоо В.Нэргүй надаас уучлалт гуйсан.