Баянзүрх дүүрэгт гарсан ослын улмаас 200 гаруй иргэн эд хөрөнгө, эрүүл мэндээрээ хохирч, үүргээ гүйцэтгэж явсан гурван алба хаагч  амиа алдсан харамсалтай хэрэг гараад 26 хоног болжээ.

             Эргэн сануулбал, нэгдүгээр сарын 24-нд шилжих шөнө Баянзүрх дүүргийн 26 дугаар хороонд  шингэрүүлсэн байгалийн хий (газ) тээвэрлэж явсан том оврын автомашин, суудлын автомашинтай мөргөлдсөн зам тээврийн осол гарсан. Тухайн үед уг том оврын автомашины тээвэрлэж явсан 60 тонн газтай ёмкос 40 метрийн алслалттай хүчтэй дэлбэрсэн.

                Гэвч иргэд одоог хүртэл хохирлынхоо хэмжээг тодорхойлуулж чадахгүй, галын дүгнэлтээ хүлээсээр байгаа аж.  Бид “Edu apart” оршин суугчдаас нөхцөлд байдал хэр байгаа талаар тодруулахад,

             Оршин суугчид угтаа галын дүгнэлт 14-21 хоногийн дотор гарах хуулийн зохицуулалттай ч их хэмжээний эд зүйлийн үнэлгээ, орлогын эх үүсвэрийг тогтоож, батлахад хүндрэл гарч, удааширч байгаа. Сар шинийн баярын өмнө төрөөс түрээсийн байрны мөнгө олгосон. Гэвч хүүхдүүдийнхээ сургууль, цэцэрлэг, ажлаасаа хол амьдарч байгаа зэрэг  хүндрэл их бий. Мөн байрныхаа бичиг баримтыг хөөцөлдөөд ажилдаа орж чадахгүй, санхүүгийн бэрхшээлтэй тулгарч байна. Мөн ипотекийн зээл, хэрэглээний лизингүүд нь  нэхэгдэж, хэцүүхэн өдрүүдийг өнгөрөөж буй талаараа ярьж байлаа.

“EDU APART” ОРШИН СУУГЧ М.ТӨРБАЯР: Даатгалын хугацаагаа сунгаж чадаагүй байтал ийм зүйл болчихлоо

        Миний хувьд оршин суугчдаа төлөөлж холбогдох төрийн байгууллагатай харилцаж байгаа оршин суугчдын багт байгаа. Галын актаа бол авч болж байгаа. Гол нь хохирлын хэмжээ л тогтооход хугацаа их орж байна.  Байрны үнэлгээг 14-21 хоногт гаргах байсан ч их хэмжээний эд зүйлийн хэмжээ, орлогын эх үүсвэрийг батлахад хүндрэл гарч, удааширч байгаа гэсэн хариуг өгөөд байгаа.  Оршин суугчдаа төлөөлж буй багийнхан аль болох түргэн хугацаанд хийх шаардлагыг хүргүүлсээр байгаа. Сүүлд гуравдугаар сарын 15-нд галын дүгнэлт гарна гэж байсан ч ойролцоогоор дөрөвдүгээр сар хүргэж магадгүй гэх хариуг өгөөд байгаа.

          Оршин суугчид маань өөрсдийн амьдарч байсан байрныхаа мкв-тай тэнцүүлж, төрөөс түрээсийн мөнгө сарын 1-3.5 сая төгрөгийн хооронд бодуулж, есөн сараар нь авсан. Түрээсийн байрны үнэ байршил болон тавилгатай эсэхээ хамаараад өөр байгаа учир төрөөс өгсөн мөнгөндөө тааруулж байраа сонгосон байх.

             Манай гэр бүлийн хувьд нэлээн хол зайд арай гэж л нэг байр олж орлоо. Хэдий гудамжинд гараагүй түрээсийн байранд байгаа ч нэг л тухгүй айлд байгаа юм шиг санагдах юм. Галд машин маань өртсөн болохоор хүүхдээ зөөхөд хүндрэлтэй л байна. Гал гарсан өдөр хүүхэд маань айгаад, нэг хэсэг л цочролын байдалтай байсан. Тэгээд хичээлдээ яваад, арай дээрдлээ. Эхнэр бид хоёр ажилдаа орж чадаагүй л явна.  Манайх байраа ипотекийн зээлээр авсан байсан. Даатгалын хугацаагаа сунгаж чадаагүй байтал ийм зүйл болчихлоо. Насаараа хөдөлмөрлөж босгосон хөрөнгөө алдаад, өмссөн хувцастайгаа гарсан бидэнд санхүүгийн дарамт их байна. Ямартай ч бид зээл авсанд банкандаа түр хугацаанд  ипотекийн зээлийн төлөлтийг зогсоож өгөх хүсэлт гаргаж байгаа.

 “EDU APART” ОРШИН СУУГЧ Г: Дэлбэрэлт болсноос хойш  буудалд амьдарч байгаад,  цагаан  сарын өмнө түрээсийн байранд орсон

         Дэлбэрэлт болсноос хойш  буудалд амьдарч байгаад,  цагаан  сарын өмнө түрээсийн байранд орсон. Би хүүхдээ сургуульд зөөгөөд, нөхөр маань ажлаа хийж байгаа. Хүүхдийнхээ сургуулиас хол түрээсийн байранд орсон дээрээс нь галд машин шатсан болохоор өглөө автобусаар хүргэж өгч байгаа. Тэгээд тарах цагийг нь хүлээж байгаад, аваад харих гэсээр орой болдог доо. Манай хүүхэд “Гэртээ харимаар байна, хуучин өрөөгөө санаж байна. Олон цаг түгжирч, автобусаар явахаар ядарч байна” гээд байгаа. Одоо тэгээд яалтай ч  билээ галын дүгнэлтээ хүлээгээд, хэзээ амьдрал хэвэндээ орохыг  мэдэхгүй  хүндхэн өдрүүдийг л өнгөрөөж байна.

“EDU APART” ОРШИН СУУГЧ Л: Үнэндээ мөнгөндөө тааруулж, байр түрээслээд өчнөөн өр зээлтэй, сэтгэл зүйн хүнд байдалтай галзуурах ч багадахаар амьдарч байна

           “Байр, машин янзалж, хохирол барагдуулж өгнө” л гэсэн  хэзээ ч тэр нь шийдэгдэх юм бүү мэд.   Буруутай этгээдийг хэзээ тогтоож, шүүх хурал нь дуусаж, бид хохирлоо барагдуулах юм.  Ингэж бодохоор л бачимдаад байна. Гурван өрөө сайхан байртай байсан бараг  юу ч үлдээгүй. Бүтэн үлдсэн эд зүйлээ зарж, хэдэн төгрөг болгоё гэж бодсон чинь хүн авахын аргагүй болсон байна лээ.  Төрөөс өгсөн түрээсийн мөнгө нь хаанаа ч хүрэхгүй байна шүү дээ. Хүүхдүүдээ сургууль, цэцэрлэгт нь явуулахын тулд ном, дэвтэр, хувцас гээд  бүх л зүйлийг нь шинээр авч өглөө. Үнэндээ мөнгөндөө тааруулж, байр түрээслээд өчнөөн өр зээлтэй, сэтгэл зүйн хүнд байдалтай галзуурах ч багадахаар амьдарч байна. Тэглээ гээд яалтай ч билээ, мэдэхгүй юм.