Завхан аймгийн Их-Уул ЗДТГ-аас Солонготын давааны овоог засварлахаар болсон талаар бид өчигдөр мэдээлсэн. Тодруулбал, Их-Уул сумын Цэцүүх багт байрлах Солонготын давааны овоог сэргээх, засах, тохижилтын ажлыг хийхээр болсон байна. Ингэхдээ тус сумын ЗДТГ-ынхан иргэн М.Энхболд гэх хүнтэй гэрээ байгуулж, орон нутгийн төсвийн 20 сая төгрөгөөр засварлаж, сэргээн засварлах ажлыг эхлүүлээд байгаа гэх.

Байгуулсан гэрээний хугацаагаар бол ажил өнгөрсөн наймдугаар сарын 21-нд эхэлж, гурав хоногийн дараа буюу есдүгээр сарын 10-нд дуусах аж. Энэ талаар гүйцэтгэгч болох иргэн М.Энхболдоос тодрууллаа.

Тэрбээр “Манай сумын иргэд “Бид” гэх нөхөрлөлийн бүлэг байгуулж, Солонготын давааны овоог сэргээх, засварлах, ажлыг гүйцэтгэж байгаа. Одоогийн байдлаар 10 гаруй хүн овоог засварлах ажлыг хийж байна. Үнэндээ, 20 сая төгрөг Солонготын давааны овоог засварлахад хүрэхгүй байна. 100 орчим мкв талбайд явган хүний зам, овоог модоор хайсалж, хамгаалах ажил хийж байгаа. Хүмүүс биднийг мөнгө идсэн гэж ярих юм. Хийгээд үзэхээр шал өөр байна шүү дээ” гэлээ.