Хөвсгөл нуурын эко системийг хамгаалах, нуурын ёроолын аюултай хог хаягдлыг цэвэрлэх, бохирдлыг багасгах зорилгоор Хөвсгөл нуурт 1985 онд живсэн “Сүхбаатар” хөлөг онгоцыг татан гаргах ажиллагааг зохион байгуулсан билээ. Татан авах ажиллагаа сар гаруйн хугацаанд үргэлжилж, “Сүхбаатар” хөлөг онгоцыг нуурын эрэгт байрлуулаад байна. Тус үйл ажиллагаанд 120 гаруй алба хаагч оролцсон билээ. Нуурын уснаас хөлөг онгоцыг татан гаргах ажиллагаанд улсын төсвөөс хоёр тэрбум төгрөг зарцуулсан гэх мэдээлэл бий. Одоогийн байдлаар тус үйл ажиллагааны зардал тодорхой болоогүй байна.

Харин “Сүхбаатар” хөлөг онгоцыг уснаас гаргах ажиллагааны макетыг найман сая төгрөгөөр захиалж хийлгэжээ. Тодруулбал, Онцгой байдлын ерөнхий газраас захиалга өгч, “Нэкст зион” ХХК макетын ажлыг гүйцэтгэсэн байна. Ингэхдээ ажлын хөлсний урьдчилгаа болох 5.6 сая төгрөгийг есдүгээр сарын 6-ний өдөр шилжүүлэн авчээ. Харин үлдэгдэл төлбөрийг гурван хоногийн дараа шилжүүлсэн байна.