Г.Алтаншагай захиралтай “Мөрөөдлийн шинэ театр” ТББ нь “Вакцинтай зун” контентыг бүтээж, Засгийн газарт 50 сая төгрөгөөр “заржээ”.

        Тодруулбал, Шадар сайд С.Амарсайханы тушаалаар коронавирусийн халдвараас урьдчилан сэргийлэх зорилгоор “Ковидгүй зуны төлөө” уриан дор иргэдэд сэрэмжлүүлэг хүргэх ажлын хүрээнд “Вакцинтай зун” контентыг хийж гүйцэтгэсэн байна.

 “Мөрөөдлийн шинэ театр” ТББ-ын бүтээсэн “Вакцинтай зун” 70 минутын контентын төлбөр болох 50 сая төгрөгийг Онцгой байдлын ерөнхий газар хариуцаж, ажиллажээ. Тус газрын шилэн дансны мэдээллээр 2021 оны аравдугаар сарын 1-нд 10 сая, аравдугаар сарын 5-нд 40 сая төгрөгийг “Мөрөөдлийн шинэ театр” ТББ-ын данс руу шилжүүлсэн байна.

         Тус контентын төлбөр нь цар тахлын үед ОБЕГ-т хуримтлагдсан ард иргэдийн хандивын мөнгөнөөс гарчээ.

Бид энэ талаар "Мөрөөдлийн шинэ театр” ТББ-ын тэргүүн, жүжигчин Г.Алтаншагайтай холбогдож, тодрууллаа.

Тэрбээр “Бид “Вакцинтай зун” контент хийгээгүй. Энэ талаарх мэдээллийг дөнгөж сая цахим орчноос уншлаа. Сайн мэдэхгүй, ойлгохгүй байна. Юуг нь ч мэдэхгүй байж мэдээлэл өгөхгүй" гэлээ. Хэдийгээр "Мөрөөдлийн шинэ театр” ТББ-ын тэргүүн, жүжигчин Г.Алтаншагай эл мэдээллийг үгүйсгэж байгаа ч "Вакцинтай зун" контентын төлбөрийг шилжүүлсэн баримт нь ОБЕГ-ын шилэн дансны мэдээлэлд байна.