МАН-ын улс төрийн “зодоон”-ы эх үүсвэр Бүлгийн даргаас эхлэлтэй юм байна. Өөрөөр хэлбэл, Г.Занданшатарын Засгийн газар бүрдэхэд Хууль зүй, дотоод хэргийн сайдаар Л.Мөнхбаатарыг томилж, УИХ дахь МАН-ын бүлэг шинэ даргатай болох шаардлага үүссэн.

     Ингээд Ерөнхийлөгч МАН-ын бүлгийн даргаар УИХ-ын гишүүн Л.Энх-Амгаланг томилуулах саналаа өгсөн ч УИХ-ын дарга асан Д.Амарбаясгалан Ерөнхийлөгчийн үгнээс зөрж, УИХ-ын гишүүн Ж.Бат-Эрдэнийг Бүлгийн даргаар томилсон юм байна. Тухайн үедээ “МАН-ын бүлгийн даргаар УИХ-ын гишүүн Л.Энх-Амгаланг томилно” гэх асуудал олон нийтийн дунд нэлээд эрчимтэй яригдаж байгаад намжсан.

       Ингэж “ах” нарынхаа үгнээс зөрсөн УИХ-ын асан Д.Амарбаясгаланг Ерөнхийлөгч “Намын даргаа ч, Их хурлын даргаа ч өг” хэмээн бухимдсан нь одоогийн Монголын төрд үүсээд байгаа улс төрийн талцалыг гол шалтгаан болсныг цагаан байрныхан жиг жуг гэх болжээ.

        Нэг ёсондоо УИХ-д сууснаасаа хойш Байнгын хороод даргалж, улмаар УИХ-ын дэд дарга, цаашлаад Хөдөлмөр нийгмийн хамгааллын сайд, Боловсрол шинжлэх ухааны сайд гэхчлэн албан тушаалын “давхар дээл”-ээр гоёж явсан УИХ-ын гишүүн Л.Энх-Амгалан Г.Занданшатарын Засгийн газар бүрдэхэд ганцаараа “дан дээл”-тэй үлдсэн.

              Нэмээд УИХ-ын сонгуулиас өмнө УИХ-ын даргын суудлыг хорхойсон сонирхож байснаас ч Ерөнхийлөгчид давхар “уламжилсан”. Гэвч Д.Амарбаясгалангаас шалтаг шалтгаангүй УИХ-ын даргын суудлыг нь “авах” боломжгүй учир Бүлгийн даргад нэрээ оруулж, улс төрийн “гал”-ыг өрдөж өгсөн сурагтай. УИХ-ын гишүүн Л.Энх-Амгалан ингэж улс төрд улайрч эхэлсэн нь “Ухаа худаг”-ийг улсад авах Засгийн газрын шийдвэртэй холбоотой байсан гэдгийг ч учир мэдэх хүмүүс ярих болжээ.

         Учир нь  “Ухаа худаг”-тай холбоотой Л.Оюун-Эрдэнийн Засгийн газрын гаргасан санал дүгнэлтийг УИХ-аар хэлэлцэхээс өмнө Л.Энх-Амгалан албан тушаалд очих “даалгавартай” байсныг нь Саарал ордныхон УИХ-ын дарга асан Д.Амарбаясгалангийн чихэнд хүргэсэн гэх.

        Харин эсрэг талд нь Зам тээврийн сайдаас муу нэртээ бууснаасаа хойш албан тушаалд очиж чадаагүй УИХ-ын гишүүн Ж.Бат-Эрдэнэ МАН-ын бүлгийн дарга болохоор Д.Амарбаясгаланг хатгаж эхэлсэн.

        Ахынхаа үгнээс зөрж үзээгүй Д.Амарбаясгалан өөрийнх нь суудалд санаархсан Л.Энх-Амгалангийн нэрийг оруулж ирмэгц нь Ж.Бат-Эрдэнийг Бүлгийн даргаар томилж, Л.Энх-Амгаланг жийсэн нь МАН-ын томчуудын зодооны эхлэлийг тавьсан байна. Харин Ерөнхийлөгчийн  хувьд өөрийнх нь саналыг эсэргүүцснийх нь хариуд намын даргаа өгөхгүй гэдгээ мэдэгдэж, Ерөнхий сайд Г.Занданшатарыг түүний эсрэг чиглүүлснээр МАН доторх эрх мэдлийн “зодоон” УИХ-ын дарга, Ерөнхий сайд хоёрыг хоёуланг нь унагаах хүртлээ эцэс  төгсгөлгүй үргэлжилжээ. Тиймдээ ч УИХ-д суугаа “MCS”-ийн бүлэглэлийнхэн Ерөнхий сайдыг өмрөөч, УИХ-ын дарга эсрэг зогссон нь Л.Энх-Амгалангийн оролцоотой гэх яриа ч гарсан байна. Цаашлаад Ж.Бат-Эрдэнийн тэргүүлсэн МАН-ын бүлгийн хуралдаанд гишүүдийн олонх нь суухгүй, тусдаа бүлэг байгуулсан. Уг бүлгийг Ж.Батжаргалаар удирдуулж эхэлсэн нь ч Ж.Бат-Эрдэнэ, Л.Энх-Амгалан нарын эрх мэдлийн төлөөх өрсөлдөөнтэй холбоотой байж мэдэх нь.

       Ингээд Их тэнгэрийн аманд ширүүсэж эхэлсэн МАН-ын “зодоон” цагаа байр руугаа орж, эцэстээ Төрийн ордныг “түймэрдэж” орхилоо. Өөрөөр хэлбэл, УИХ-ын дарга, Ерөнхий сайд хоёрт ингэж нэгнээ татан унагаах хүртлэх “гал”-ыг өрдөж, өгсөн хүн нь Л.Энх-Амгалан, Ж.Бат-Эрдэнэ нарын Бүлгийн даргын төлөөх тэмцэл байжээ.

      Ёстой л МАН-ынхан жоомоо алах гэж байгаад гэрээ шатаав гэгч болов. Уг нь МАН-д эрх мэдлийн бүх албан тушаал бий. Тэдэнд Ерөнхийлөгч нь бий. УИХ-ын даргын эрх, Ерөнхий сайдаа томилж, танхимаа бүрдүүлэх бүрэн эрх нь тэр чигтээ байна. Харамсалтай нь, одоо МАН-д эв нэгдэл алга. Тиймдээ ч эрх мэдэлдээ ташуурсан МАН-ынхан хөл толгойгоо олохоо байтлаа талцаж явна. Эцэст нь, дахин сануулахад Л.Энх-Амгалан сахал Ж.Бат-Эрдэнэ хоёрын албан тушаалын шунал МАН-ыг самарч, Монголын төрийг хямралд орууллаа.