Эрүүл мэндийн яам болон ХӨСҮТ-өөс коронавирусийн нөхцөл байдлын талаарх ээлжит мэдээллээ өгөх үеэр ЭМЯ-ны Ахлах шинжээч Д.Нарангэрэл сэтгүүлчдийн асуултад хариуллаа.

-Бразил Улсад эмнэлгийн ажилтан коронавирусийн эсрэг вакцины эхний тунг тариулсныхаа дараа халдвар авсан. Манай улсад дархлаажуулалтад хамрагдсан ажилчид халдвар авахгүй гэсэн баталгаа байгаа юу?

-Дэлхий дахин коронавирусийн эсрэг вакцин хийж эхэлснээс хойш халдвар авсан тохиолдол мэр сэр бүртгэгдсэн байна лээ. Түүний нэг жишээ нь Бразил Улс байх. Үүнийг судлаачид тухайн хүн халдвар аваад нууц үеийн хугацаанд вакцин тариулсан байж болзошгүй гэж иаамаглаж байгаа. Мөн вакцин тариулсны дараа хараахан дархлаа тогтоогүй хугацаанд халдвар авсан байж болно гэж тайлбарласан. Манай улсын хувьд эрүүл мэндийн байгуллагын 6200 ажилтан вакцинд хамрагдсан байна.

-Баянгол дүүргийн 25 дугаар хорооны 301 дүгээр байранд нийт хэдэн хүнээс халдвар илэрсэн бэ?

-Сүүлийн 24 цагт шинээр илэрсэн халдварын тохиолдлууд Улаанбаатар хотын Баянгол, Баянзүрх, Сүхбаатар, Хан-Уул, Чингэлтэй дүүрэгт бүртгэгдсэн. Тодруулбал, Баянгол дүүргийн 25 дугаар хорооны 301 дүгээр байранд оршин суудаг нэг иргэнээс коронавирус илэрсэн тул хөл хориог үргэлжлүүлэн тогтоож байгаа.

“Нэг хаалга-Нэг шинжилгээ” нэгдсэн арга хэмжээний хүрээнд 176 шинэ тохиолдлыг илрүүлсэн. Нийт тохиолдлын эхний 61 нь анхны шинжилгээгээр халдвартай болох нь тогтоогдсон бол 115 нь тэдгээрийн хавьтлын дундаас илэрсэн

-“Нэг хаалга-Нэг шинжилгээ” нэгдсэн арга хэмжээний нэгдсэн хариу гарсан уу. Энэ талаарх мэдээллийг хэзээ өгөх вэ?

-“Нэг хаалга-Нэг шинжилгээ” нэгдсэн арга хэмжээний хариу гарсан. Эрүүл мэндийн яам  нэгдсэн тайлангаа гаргаж, УОК, Засгийн газарт танилцуулсан байгаа. Энэ арга хэмжээний хүрээнд 176 шинэ тохиолдлыг илрүүлсэн. Нийт тохиолдлын эхний 61 нь анхны шинжилгээгээр халдвартай болох нь тогтоогдсон бол 115 нь тэдгээрийн хавьтлын дундаас илэрсэн. Хавьтлуудыг одоогийн баримталж байгаа журмын дагуу тусгаарлаж байгаа.

-Стратегийн ач холбогдолтой гурван байгууллагад вакцинжуулалт хийж эхэлсэн. Ямар гурван байгууллага үүнд багтаж байгаа вэ?

-Вакцинжуулалт хийх  хүмүүсээ таван ангилалд хуваан, төлөвлөсөн байгаа. Хамгийн түрүүнд коронавирусийн халдвартай нүүр тулан тэмцэж, өвчтөнүүдийг эмчилж байгаа эмч, сувилагч, хоёрдугаарт, эрчимт эмчилгээ, яаралтай тусламж, сэхээн амьдруулах тасагт ажилладаг эмч, эмнэлгийн ажилтан, гуравдугаарт, өрхийн эмнэлэг, өрхийн эмч нар, дөрөвдүгээрт, хүчний байгууллагад ажилладаг цагдаа, онцгой, хилийн мэргэжлийн хяналт зэрэг байгууллагын хүмүүсийг дархлаажуулалтад хамруулж байгаа. Эдгээр байгууллагын ажилчид хариу арга хэмжээний багт ажиллаж, өвчтөнүүдийг тусгаарлах үйл ажиллагаанд оролцож байгаа. Цаашид 59-69 насны архаг хууч өвчтэй болон халдвар авсан тохиолдолд хүндэрч, эндэх магадлалтай хүмүүсийг үе шаттайгаар дархлаажуулна.