Нийслэлийн удирдах ажилтнуудын шуурхай зөвлөгөөн өнөөдөр боллоо. Хурлын үеэр нийслэлийн ерөнхий боловсролын сургуулиудын хичээлийг эхлүүлэх бэлтгэл ажил хэрхэн хангагдаж байгаа талаар Нийслэлийн боловсролын газрын дарга Ж.Гантулга танилцууллаа.

Тэрбээр “Ерөнхий боловсролын сургууль, цэцэрлэгийн ариутгал халдваргүйжүүлтийг хийж байна. Одоогоор 12 сургууль дээр шинжилгээ авах цэг ажиллаж байгаа. Тэдгээр сургуульд ариутгал, халдваргүйжүүлэлт хийх шаардлагатай. Мөн сургуулийн автобусны бэлэн байдлыг хангах ажлыг Нийтийн тээврийн үйлчилгээний газар болон Тээврийн цагдаагийн газартай хамтран зохион байгуулж байна” гэв.

Нийслэлийн Засаг дарга бөгөөд Улаанбаатар хотын захирагч Д.Сумъяабазар нийслэлийн ерөнхий боловсролын сургууль, цэцэрлэгийн үйл ажиллагаа эхэлтэл ариутгал, халдваргүйжүүлэлт сайн хийж, бэлтгэл ажлаа сайтар хангаж, хүүхдийн автобусны аюулгүй ажиллагааны асуудалд онцгой анхаарахыг холбогдох албаныханд санууллаа.

Нийт 4702 аж ахуйн нэгж байгууллагад түр журам, тусгай нөхцөл шаардлага хүргүүлсэн

Түүнчлэн хоёрдугаар сарын 23-наас үйл ажиллагаагаа хэвийн явуулж эхэлсэн аж ахуйн нэгжүүдэд арга зүйн зөвлөгөө өгөх ажлын хүрээнд нийт 4702 аж аухйн нэгжид түр журам хүргүүлжээ. Тодруулбал, худалдааны 2429, хоол үйлдвэрлэл үйлчилгээний 911, ахуйн үйлчилгээний 840, авто засвар үйлчилгээний 279, бусад 243 нийт 4702 аж ахуйн нэгж байгууллагад түр журам, шаардлага хүргүүлж, зөвлөн туслах үйлчилгээ үзүүлсэн байна.