Элсэлтийн ерөнхий шалгалтын бүртгэл өнөөдрөөс эхлэн дөрөвдүгээр сарын 26-ныг дуустал цахимаар үргэлжилнэ

2024-02-19, 178

Элсэлтийн ерөнхий шалгалтын энэ жилийн бүртгэл, үйл ажиллагаатай холбоотойгоор Боловсролын үнэлгээний хэлтсийн Л.Ганбат мэдээлэл өглөө.

Тэрбээр "Монгол хэл, бичгийн шалгалтын бүртгэл өнөөдрөөс эхлээд гуравдугаар сарын 15-ныг дуустал онлайнаар үргэлжилнэ.

Монгол хэл, бичгийн шалгалт өгөөд 400 оноондоо хүрч чадаагүй сурагч бусад хичээлээр элсэлтийн шалгалт өгч болдог. Элсэлтийн шалгалтын босго оноотой байгаад монгол хэл, бичгийнхээ 400 оноог давж байж дотоодын их, дээд сургуульд элсэх боломжоор хангагдаад явдаг. Монгол хэл, бичгийн шалгалтыг дөрөвдүгээр сарын 6-нд 10:00 цагаас улсын хэмжээнд нэгдсэн байдлаар авна.

ЭЛСЭЛТИЙН ЕРӨНХИЙ ШАЛГАЛТЫН БҮРТГЭЛ ӨНӨӨДӨР 09:00 ЦАГААС ЭХЛЭН ДӨРӨВДҮГЭЭР САРЫН 26-НЫ 18:00 ЦАГ ДУУСТАЛ ЯВАГДАНА.

Сурагчид монгол хэл, бичиг, элсэлтийн ерөнхий шалгалтынхаа бүртгэлийг Боловсролын үнэлгээний газрын цахим вэб хуудас руу хандаж онлайнаар бүртгүүлэх боломжтой. Элсэлтийн шалгалтыг, монгол хэл, англи хэл, физик, математик, орос хэл, биологи, түүх, нийгэм судлал, газар зүй, хими зэрэг арван хичээлээс тухайн суралцагч ямар хөтөлбөрөөр суралцаж байгаа гэдгээс хамаарч хамгийн багадаа хоёр хичээл, ихдээ арван хичээлийг хүссэнээрээ сонгох боломжтой" гэв.

Элсэлтийн ерөнхий шалгалтын бүртгэл өнөөдрөөс эхлэн дөрөвдүгээр сарын 26-ныг дуустал цахимаар үргэлжилнэ