“Эрдэнэт" ТӨҮГ-ын үйлдвэрлэлийн технологид шаардлагатай эргэлтийн ус хөлдөж доошилсноос үүдэн тодорхой хугацаанд Баяжуулах үйлдвэрийн Өөрөө нунтаглах хэсэг ажиллахгүй болоод байсан. Тэгвэл тус хэсгийн үйл ажиллагаа хэвийн явагдаж эхэлсэн байна.

Энэ талаар Баяжуулах үйлдвэрийн Өөрөө нунтаглах хэсгийн дарга Р.Эрдэнэ-Очир “Өнгөрсөн долоо хоногт Эрдэнэт үйлдвэрийн үйлдвэрлэлийн технологид чухал шаардлагатай эргэлтийн усны хомсдлоос шалтгаалан тодорхой доголдол үүссэн. Үүний улмаас үйлдвэрлэлээ түр хязгаарлах шаардлага зүй ёсоор бий болсон. Энэ нь үйлдвэрлэлийн тоног төхөөрөмж ямар нэг байдлаар эвдэрч гэмтсэнтэй холбоогүй.  Зөвхөн эргэлтийн усны хангамжтай холбоотой асуудал үүссэн учраас Өөрөө нунтаглах хэсгийн үйл ажиллагаа буюу гурван секц тус бүр дээр дөрөв хоногийн хугацаатай хязгаарлалт хийсэн. Бид энэ цаг хугацааг ашиглан үйлдвэрийн хэмжээнд хийхээр батлагдсан төлөвлөгөөт засварын ажлыг амжуулж хийлээ. Өөрөөр хэлбэл, нэгэнт технологийн дагуу хийж буй хязгаарлалт учраас ойрын хугацаанд хийхээр төлөвлөсөн засварын ажлуудыг наашлуулж, хийж гүйцэтгэсэн. Ингэснээр дараагийн саруудад хийх засварын ажлууд багасаж, үйлдвэрлэлийн бүтээмж дээшлэх боломжтой болж байна” хэмээн ярьжээ.