Хөвсгөл аймгийн Ханх сумын төвөөс баруун урд зүгт 48 км-т орших Хороо багийн “Адуун” гэдэг газар гуравдугаар сарын 1-ний 13:30 цагт 4.1 магнитудын хүчтэй газар хөдлөлт болжээ.

Энэ тухай мэдээллийг ШУА-ын Одон орон, геофизикийн хүрээлэнгээс онцгой байдлын албанд 13:44 цагт цахим шуудангаар ирүүлсэн байна. Тус аймгийн Онцгой байдлын газраар дамжуулан Ханх сумын Засаг даргаас тодруулахад иргэдэд чичирхийлэл мэдрэгдсэн бөгөөд учирсан хохиролгүй гэж мэдээлжээ.

Хөвсгөл аймгийн Ханх суманд   2021 оны нэгдүгээр сарын 12-ны 05:32 цагт  6.5 магнитудын хүчтэй газар хөдлөлт болсон. Уг хүчтэй газар хөдлөлтөөр өдөөгдсөн газрын гүн дэх эвдрэлийн процесс эрчимтэй явагдаж улмаар тухайн бүс нутагт олон тооны давталт газар хөдлөлтүүд болсоор байна.

Зураг : Хөвсгөл аймгийн Ханх сумаас баруун урагш магнитуд нь 6.5-тай хүчтэй газар хөдлөлтийн төвийн байршлыг харуулав (улаан таван хошуугаар тэмдэглэв)

Тухайлбал, өнгөрсөн нэгдүгээр сарын 13–ны 10:00 цагийн байдлаар тус бүс нутагт 586 удаагийн газар хөдлөлт бүртгэгдсэнээс магнитуд 3.5-болон түүнээс дээш хүчтэй газар хөдлөлт 83 удаа болсон. Тус газар хөдлөлт нь голомтондоо VII-VIII баллын хүчтэй чичирхийлэл үүсгэсэн ба Хөвсгөл аймгийн бүх сумд, Завхан, Увс, Хэнтий аймгийн зарим сумын оршин суугчид болон Сэлэнгэ, Дархан, Орхон-Уул, Улаанбаатар хотын ард иргэд мэдэрсэн байна.

Түүнчлэн уг бүс нутагт 1950 оны 4-р сард 6.8 магнитудтай, 1985 оны 4 сард 5.3  магнитудтай газар хөдлөлт болж байжээ.