Ирх гурван сард цаг агаарын төлөв байдал ямар байх, бүс нутгуудаар хур тунадас хэр орох талаар Цаг уур, орчны шинжилгээний газрын цаг уурч Б.Жаргалан, ЦУОШГ-ын Урьдчилан мэдээлэх хэлтсийн дарга Л.Оюунжаргалаас тодрууллаа.

-Ирэх гурван сард цаг агаарын төлөв байдал ямар байхаар байна вэ?

-Агаарын температурын хувьд нутгийн баруун, өмнөд хэсэг буюу Баян-Өлгий, Ховд, Говь-Алтайн нутгаар, Увс, Завхан, Өвөрхангайн баруун өмнөд хэсэг,  Банхонгор аймгийн өмнөд хэсэгт олон жилийн дунджаас дулаан, бусад нутгаар дунджийн орчим байх төлөвтэй байгаа. Хур тундасын хувьд Говь-Алтай, Баянхонгор, Өмнөговь аймгийн өмнөд хэсгээр болон Дорноговь аймгийн өмнөд захын сумдын нутгаар олон жилийн дунджаас бага, нутгийн зүүн хойд хэсэг буюу Хэнтий аймгийн хойд хэсэг, Дорнодын нутгаар олон жилийн дунджаас ахиу, бусад нутгаар дунджийн орчим хур тунадас орох төлөвтэй байгаа.

Говь-Алтай, Баянхонгор, Өмнөговь аймгийн өмнөд хэсгээр болон Дорноговь аймгийн өмнөд захын сумдын нутгаар хур тунадас олон жилийн дунджаас бага орно

-Муудалтын үе буюу сарын эхэнд аль бүс нутгаар агаар муудаж, цас шуурах төлөвтэй байгаа вэ? 

-Сарын муудалтын үеүдийг аваад үзвэл ирэх сарын нэгдүгээр 10 хоногийн эхэн, хоёрдугаар 10 хоногийн эхээр ихэнх нутгаар, гуравдугаар 10 хоногийн эхэн болон сүүл үеэр баруун, төв, зүүн зүгийн нутгаар муудалтын үеүд таарч байгаа. Муудалтын үе гэдэг нь сарын эхэнд агаар муудаж, цас их шуурах, температур сэрүүсэх, салхины хурд нэмэгдэж шороо шуурах зэрэг муудалтын процесс явагдахыг хэлнэ.

Онцгойлж хэлэх зүйл бол ирэх сарын хоёрдугаар 10 хоногийн эхэн болон дунд үеэр ихэнх нутгаар нэлээн салхи шуургатай байх төлөвтэй байгаа. Ялангуяа, Алтайн салбар,  говийн бүсийн нутгаар салхи шуургатай, цасан болон шороон шуургатай байхаар байна.