Сүүлийн өдрүүдэд хаврын урь орж, ихэнх нутгаар нэмэх хэмтэй буюу харьцангуй дулаан байлаа. Тэгвэл өнөөдрөөс эхлэн хүйтний эрч чангарч, зарим нутгаар цасан шуурга шуурч, -30 хэм хүрнэ гэх мэдээ гараад байгаа. Иймд ойрын өдрүүдэд цаг агаар ямар төлөвтэй байх талаар ЦУОШГ-ын Урьдчилан мэдээлэх хэлтсийн дарга Л.Оюунжаргалаас тодрууллаа.

-ОХУ-аас хүчтэй агаарын урсгал манай орныг дайрч, -30 хэм хүрнэ гэсэн мэдээлэл гараад байгаа. Энэ талаар тодорхой мэдээлэл өгөхгүй юү?

-Одоогоор баруун нутгаас эхлээд цас орж, шуурч эхэлсэн. Цаг агаарын аюултай үзэгдлийг гурван төрөлд хуваадаг. Нэгдүгээрт, цаг агаарын гэнэтийн үзэгдэл болох гэж байгаа, цаашлаад аюултай үзэгдэл болж болзошгүй гэсэн нөхцөлд бид анхааруулах мэдээ, хоёрдугаарт, аюултай үзэгдэл болно гэсэн нөхцөлд сэрэмжлүүлэг мэдээ гаргадаг. Энэ үзэгдлийн хүрээнд бид цасан шуурга болно гэж үзэн, өчигдрөөс сэрэмжлүүлэг мэдээ гаргаж эхэлсэн. Одоогоор Говь-алтай аймгийн хойд, Завхан, Архангай, Булган аймгийн өмнө тал зэрэг баруун аймгуудад цасаар шуурч, Архангай аймгийн хойд талаар нойтон цас орж байна. Энэ үзэгдэл өнөө шөнөдөө төв аймгуудын нутаг, зүүн аймгуудын нутгийн баруун талаар дайрч өнгөрнө. Агаарын температур энэ өдрүүдэд -30 хэм хүрнэ. Энэ нь урьд өмнө болж байгаагүй аюултай үзэгдэл биш.

Энэ үзэгдэл өнөө шөнөдөө төвийн аймгуудын нутаг, зүүн аймгуудын нутгийн баруун талаар дайрч өнгөрнө. Агаарын температур энэ өдрүүдэд -30 хэм хүрнэ

-Ойрын өдрүүдэд цаг агаарын төлөв байдал ямар байхаар байна вэ?

-Дээр хэлсэн үзэгдэл маргааш өдөртөө зүүн аймгуудын нутгийн өмнө талаар дайрч, өнгөрнө. Ерөнхийдөө хоёрдугаар сарын 27-28-нд ихэнх нутгаар өмнөх хоногуудаас хүйтний эрч чангарч, 5-10 хэмээр хүйтэрнэ. Улаанбаатар хотод гэхэд өнөөдөр +5 хэм байгаа бол  маргааш -10 хүрнэ. Харин гуравдугаар сарын 1-нээс ихэнх нутгаар дулаарч эхэлнэ.