Гадаад харилцааны яамнаас өнөөдөр мэдээлэл хийх үеэр  өнгөрсөн жилийн дөрөвдүгээр сараас хойш Гадаадад байгаа иргэдэд туслах сангаас 941 иргэнд 3.4 тэрбум төгрөгийн тусламж олгосон талаар хэлэв.

Гадаад харилцааны сайд Б.Батцэцэг “Иргэдийг агаарын замаар татан авахаас гадна хөрш орнуудаас нутаг буцах иргэдийн хүсэлтийг Гадаад харилцааны яамны зүгээс УОК-т танилцуулсан. Мөн ОХУ-аас буцах хүсэлт гаргаад байсан 43 иргэнийг өчигдөр Алтанбулаг боомтоор татан авсан. Өнөөдрийн байдлаар нийт 29385 иргэнээ дэлхийн 93 улсаас татан аваад байна.

Агаарын замаар 126 удаагийн нислэгээр 22675, автозамын боомтоор 6710 иргэн эх орондоо иржээ

Иргэдэд туслах сангийн журмаар 2021 оны эхний хоёр сард 65 иргэний өргөдөл, хүсэлтийг шийдвэрлэж, үүнд 75.106 сая төгрөг зарцуулсан.

Цар тахлын улмаас хилийн чанадад санхүүгийн хүнд байдалд орсон монгол иргэдийг эх оронд нь ирүүлэхэд дэмжлэг туслалцаа үзүүлэх үүднээс НҮБ-ын Олон улсын шилжилт хөдөлгөөний байгууллагатай өнгөрсөн жилийн дөрөвдүгээр сараас хойш идэвхтэй хамтарч, 941 иргэнд 3.4 тэрбум төгрөгийн дэмжлэг үзүүлсэн. Энэхүү тусламжийг Их Британи, Чех, Европын холбоо зэрэг хандивлагчдын дэмжлэгтэйгээр олгосон гэдгийг онцлон тэмдэглэе” гэв.